5 mart kuni Markaziy ko‘rgazmalar zalida 8-mart – Xalqaro xotin-qizlar kuniga bag‘ishlangan “Bahor vernisaji” badiiy ko‘rgazmasining tantanali ochilish marosimi bo‘lib o‘tdi. Tadbir O‘zbekiston Badiiy akademiyasi, Badiiy ko‘rgazmalar direksiyasi hamda O‘zbekiston Badiiy ijodkorlar uyushmasi tomonidan tashkil etildi.
Mazkur ko‘rgazma ayol rassomlar tomonidan yaratilgan asarlarni bir joyga jamlagan bo‘lib, ular bahorning nozik tuyg‘ulari, orzu-umidlari va jo‘shqin kechinmalarini o‘zida mujassam etgan. Ushbu ijod namunalari orqali ayol qalbining eng nafis va teran hissiyotlari – muhabbat, sog‘inch, armon va ezgu orzular aks etgan.
Ko‘rgazma doirasida rangtasvir, grafika, haykaltaroshlik, mayda plastika hamda nafis chinni buyumlar namoyish etilmoqda. Barcha san’at ixlosmandlari 31-martga qadar ushbu bahoriy san’at bayramidan bahramand bo‘lishlari mumkin.