TOShKENT, 13 fev — Sputnik. Rossiya Ukrainadagi vaziyatni hal qilish uchun muzokaralar guruhini tuzishga tayyorgarlik ko‘rishni boshladi. Bu haqda Rossiya prezidenti matbuot kotibi Dmitriy Peskov ma’lum qildi.
Peskov jurnalistlarning “Ukrainadagi vaziyatni hal qilish uchun muzokaralar guruhini tuzishga tayyorgarlik boshlandimi?”, degan savoliga javob berdi.
"Albatta, boshlandi. Prezident tegishli qaror qabul qilishi bilanoq sizga xabar beramiz",— deydi u.
Uning qayd etishicha, Ukraina bo‘yicha mumkin bo‘lgan muzokaralar jarayoni formati to‘g‘risida tushunchaga ega bo‘lmaguncha, Yevropaning unda ishtirok etishi haqida gapirishga erta.
NATO bosh kotibi Mark Ruttening ma’lum qilishicha, Rossiya va AQSh prezidentlari Vladimir Putin va Donald Tramp o‘rtasidagi suhbat Ukraina bo‘yicha muzokaralar boshlangani haqida “taassurot uyg‘otadi”.
"Bu shunday taassurot qoldirayotgani aniq. Bu omadli telefon qo‘ng‘irog‘i bo‘ldi. Biz hammamiz Ukrainada tinchlik bo‘lishini xohlaymiz", — deydi u.
Uning so‘zlariga ko‘ra, Ukrainaning bu jarayonda ishtirok etishini ta’minlash, shuningdek, kelajakdagi kelishuvlarning mustahkamligini ta’minlash kerak.
Rossiya va AQSh prezidentlari Vladimir Putin va Donald Tramp chorshanba kuni deyarli bir yarim soat davom etgan telefon muloqoti o‘tkazdi. Rossiya prezidenti matbuot kotibi Dmitriy Peskovning xabar berishicha, davlat rahbarlari Rossiya va AQSh fuqarolarini almashish, shuningdek, Ukrainadagi vaziyatni tartibga solish masalalarini muhokama qilgan.
Prezidentlar boshqa mavzularga ham to‘xtalib o‘tishdi: Yaqin Sharqdagi kelishuv, Eron yadro dasturi, iqtisodiy sohadagi ikki tomonlama Rossiya-Amerika munosabatlari. Putin va Tramp shaxsiy aloqalarni davom ettirishga, jumladan, shaxsiy uchrashuv tashkil etishga kelishib oldi.
