TOShKENT, 18 yanv — Sputnik. Rossiyaning Rostov viloyatida O‘zbekiston agrosanoat xabi yaratilishi mumkin. Bu haqda “Dunyo” AA xabar berdi.
O‘zbekiston bosh konsuli Burxon Aliqulov Rostov viloyati iqtisodiy rivojlanish vaziri Maksim Papushenko bilan uchrashuv o‘tkazdi.
Muloqot chog‘ida tomonlar O‘zbekiston va Rossiya hududlari o‘rtasidagi o‘zaro manfaatli aloqalar kengayib borayotganligini yuqori baholadi. Rostov viloyatining sanoat va qishloq xo‘jaligi sohasidagi salohiyatini inobatga olib, mazkur yo‘nalishlarda hududlararo sheriklikni yanada rivojlantirish muhimligi qayd etildi.
Burxon Aliqulov O‘zbekiston hududlari eksport imkoniyatlarini hisobga olib, Rostov viloyati uchun kerakli mahsulotlar importini tashkil etish masalasida amaliy ko‘mak berishga tayyorligini bildirdi.
Vazir Maksim Papushenko o‘z navbatida, Jizzax va Rostov viloyatlari o‘rtasida imzolangan hamkorlik bitimi, shuningdek, Rostov viloyati gubernatori boshchiligidagi delegatsiyaning 2024-yil sentabr oyida O‘zbekistonga qilgan tashrifi chog‘ida erishilgan kelishuvlar doirasida viloyatda O‘zbekiston agrosanoat xabini yaratish muhimligini ta’kidladi.