TOShKENT, 26 noya — Sputnik. 2025 yil 1-yanvardan Toshkentdagi avtobus va metropoliten qatnovlari uchun yo‘lkira narxi oshiriladi. Bu bo‘yicha Toshkent shahar hokimligi tegishli qaror loyihasini ishlab chiqdi.
Hujjat bilan kelasi yil 1-yanvardan jamoat transporti yo‘nalishlarida (avtobus va metropoliten) qatnovlarni amalga oshirish uchun yo‘lkira haqining bir qator cheklangan tariflari belgilanmoqda.
bir yo‘lovchi qatnovi uchun cheklangan tarif — 3000 so‘m. Bunda, bir yo‘lovchi qatnovi uchun 1-martalik to‘lovni elektron to‘lov tizimi orqali amalga oshirilganda rag‘batlantiruvchi chegirma qo‘llanilgan holda — 1 700 so‘m undiriladi;
bir yo‘lovchining bagajini tashish bo‘yicha xizmat uchun — 4000 so‘m;
qatnovlar soniga bog‘liq holda belgilangan tarif rejalarini hisoblash uchun cheklangan tarif — 1600 so‘m.
“Qatnovlar soniga bog‘liq holda belgilangan transport kartalarining va transport kartalaridan foydalanilgan holda bir soat ichida bir yo‘nalishli yo‘lovchi transportidan boshqasiga o‘tish sonidan kelib chiqqan holda imtiyozli va bepul tarif rejalarining narxlari o‘zgarishsiz qoldirilsin”, — deyilgan hujjat matnida.
Qayd etilishicha, poytaxt yo‘nalishlaridagi barcha avtobuslar salonida yo‘l haqini naqd pulda olish amaliyotidan voz kechiladi. Yo‘lkira haqini faqat elektron tarzda qabul qilish amaliyoti joriy etiladi.
Ma’lumot uchun, hozirda bir yo‘lovchi qatnovi uchun cheklangan tariflar naqd pul bilan 2000 so‘m, barcha turdagi bank kartalari va ATTO transport kartasi orqali to‘lov uchun esa 1700 so‘m.