TOShKENT, 11 okt — Sputnik. Shavkat Mirziyoyev bugun Ashxobodda bo‘lib o‘tgan buyuk turkman shoiri Maxtumquli Firog‘iy tavalludining 300-yilligiga bag‘ishlangan "Zamon va sivilizatsiyalarning o‘zaro bog‘liqligi - tinchlik va taraqqiyot asosi" mavzusidagi xalqaro forumda nutq so‘zladi.
"O‘zbekistonda Maxtumquli ijodi yuksak qadrlanadi. Shoir Xiva shahridagi Sherg‘ozixon madrasasida tahsil olib, dunyoviy va diniy ilmlarni o‘rgangan. U buyuk o‘zbek shoiri va mutafakkiri Alisher Navoiyni chuqur hurmat qilgan", - dedi O‘zbekiston prezidenti.
Shuningdek, Shavkat Mirziyoyev 2024-yilda O‘zbekistonda ham Maxtumquli Firog‘iy tavalludining 300-yilligi keng nishonlanayotgani ham aytib o‘tdi. Anjuman, seminar, adabiy kecha, tanlov, spektakllar va boshqa tadbirlar o‘tkazilmoqda. O‘zbek va turkman kinoijodkorlari tomonidan shoir haqida hamkorlikda badiiy film suratga olindi.
Turkmaniston prezidenti Serdar Berdimuhamedov O‘zbekiston prezidentiga minnatdorlik bildirib, Maxtumquli tavalludining 300-yilligi medali bilan mukofotlanishini ma’lum qildi.
Tadbir nihoyasida forumning yakuniy hujjati qabul qilindi.