TOShKENT, 30 sen — Sputnik. Ayrim davlatlarda ijtimoiy tarmoqlarga qaramlik holati o‘g‘il bollarga qaraganda qizlarda ko‘proq kuzatilmoqda. Bu haqda O‘zbekiston Sog‘liqni saqlash vazirligi Jahon sog‘liqni saqlash tashkiloti (JSST) hisobotiga tayanib xabar berdi.
JSST yangi asrdagi global muammo — ijtimoiy tarmoqlar va kompyuter o‘yinlariga qaramlik oqibatlari haqida hisobot e’lon qildi.
Unda qayd etilishicha, ushbu muammo tufayli dunyo bo‘yicha har o‘n o‘smirdan biri psixologik qiyinchiliklarga duch kelmoqda.
O‘g‘il-qizlar o‘rtasida ijtimoiy tarmoqlarga qaramlik darajasi 2018-yili 7 foizni tashkil etgan bo‘lsa, 2022-yilda bu ko‘rsatkich 11 foizga oshgan.
“Ana shu o‘smirlarning 12 foizi ruhiyati va xulq-atvoriga salbiy ta’sir ko‘rsatuvchi dasturiy o‘yinlar ta’siriga tushib qolgani jiddiy xavotir uyg‘otadi”, — deyiladi hisobotda.
Mazkur xulosalarni olish uchun 2022-yili Yevropa, Markaziy Osiyo davlatlari va Kanadani qamrab olgan 44 ta mamlakatda 11, 13 va 15 yoshli 280 mingga yaqin yoshlar o‘rtasida ijtimoiy so‘rov o‘tkazilgan.
Ma’lum bo‘lishicha, mazkur qatlamning 11 foizi ijtimoiy tarmoqlarga qaram bo‘lib qolgan. Bu holat qizlarda (13 foiz) o‘g‘il bolalarga (9 foiz) nisbatan ko‘proq. Kompyuter o‘yinlariga bog‘lanib qolish holati esa o‘g‘il bolalarda (16 foiz) qizlarga (7 foiz) nisbatan yuqori.
Shundan kelib chiqib, ekspertlar muammoning oldini olish uchun zarur chora-tadbirlar ko‘rish yuzasidan hukumatlarga tegishli tavsiyalar berdi.