TOShKENT, 14 sen — Sputnik. O‘zbekiston davlat yosh tomoshabinlar teatri jamoasi Rossiyaning Elista shahrida o‘tkazilayotgan “Keyeda” IV xalqaro bolalar teatrlari festivalida mukofotlandi. Bu haqda teatr matbuot xizmati Sputnik O‘zbekiston muxbiriga ma’lum qildi.
13 sentabr kuni O‘zbekistonda xizmat ko‘rsatgan artist Malika Iskandarova tomonidan sahnalashtirilgan “Muxa-Sokotuxa” muzikl spektakli namoyish etildi.
B.Basangov nomidagi milliy dramatik teatr direktori Galina Shurayeva o‘zbek teatri jamoasini maxsus diplom va statuetka bilan taqdirladi.
Qalmiq Respublikasi Madaniyat vazirligi san’at bo‘limi boshlig‘i Natalya Gadanova ijodiy jamoaga minnatdorlik bildirdi. Shuningdek, Rossiya Federatsiyasi Teatr arboblari uyushmasi hududiy bo‘lim boshlig‘i Sergey Burlachenko ham jamoaga festivaldagi ishtirok uchun minnatdorlik bildirdi.
Rossiyaning Elista shahrida 10-15 sentabr kunlari “Keyeda” xalqaro teatr festivali bo‘lib o‘tmoqda.