TOShKENT, 27 avg — Sputnik. Mustaqil Davlatlar Hamdo‘stligi (MDH) bosh kotibi Sergey Lebedev O‘zbekiston Oliy Majlis Qonunchilik palatasi, xalq deputatlari tuman, shahar Kengashlari saylovida Hamdo‘stlik kuzatuvchilari missiyasiga rahbarlik qiladi. Bu haqda MDH Ijroiya qo‘mitasi matbuot xizmati xabar berdi.
Sergey Lebedevning nomzodi Hamdo‘stlikka a’zo davlatlarning Hamdo‘stlikning ustav va boshqa organlari huzuridagi Doimiy vakolatli vakillari kengashi qarori bilan tasdiqlangan.
Qayd etilishicha, MDH kuzatuvchilari missiyasi O‘zbekiston tomonining taklifiga binoan “Davlatlarda demokratik saylovlar, saylov huquqlari va erkinliklari standartlari to‘g‘risida”gi Konvensiya, O‘zbekiston qonunchiligiga amal qilgan holda saylov kampaniyasini kuzatib boradi.
Shu bilan birga, MDH Kuzatuvchilari missiyasi faoliyati ochiqlik, betaraflik va saylov jarayoni va davlatning ichki ishlariga aralashmaslik tamoyillariga asoslanadi.
Ma’lumot uchun, MDH bosh kotibi 2015, 2016 va 2021 va 2023-yillarda O‘zbekistonda bo‘lib o‘tgan prezident saylovlari, shuningdek, 2014, 2019-yillarda bo‘lib o‘tgan parlament saylovlarida MDH kuzatuvchilari missiyasiga rahbarlik qilgan.
Eslatib o‘tamiz, 27-oktabr kuni O‘zbekiston Oliy Majlisi Qonunchilik palatasi, Xalq deputatlari viloyatlar va Toshkent shahar kengashlari, Xalq deputatlari tuman va shahar kengashlariga saylovlar bo‘lib o‘tadi.
Saylovda ishtirok etish uchun quyidagi siyosiy partiyalarga ijozat berildi:
Tadbirkorlar va ishbilarmonlar harakati – O‘zbekiston Liberal-demokratik partiyasiga;
O‘zbekiston “Milliy tiklanish” demokratik partiyasiga;
O‘zbekiston Ekologik partiyasiga;
O‘zbekiston Xalq demokratik partiyasiga;
O‘zbekiston “Adolat” sotsial demokratik partiyasiga.