TOShKENT, 27-iyun — Sputnik. O‘zbekistonning Yevroosiyo taraqqiyot banki (YeOTB)ga qo‘shilishi bilan bog‘liq huquqiy masalalar yil oxirigacha hal qilinadi, mamlakat bank kapitalining taxminan 10 foizini oladi. Bu haqda jurnalistlarga bank rahbari Nikolay Podguzov ma’lum qildi.
Olmaotada Yevroosiyo taraqqiyot bankining yillik yig‘ilishi bo‘lib o‘tdi. Unda so‘zga chiqqan YeOTB boshqaruvi raisi O‘zbekistonning YeOTBga a’zo bo‘lishi bilan bog‘liq huquqiy masalalar yil oxirigacha hal qilinishini ma’lum qildi.
“Aytishim mumkinki, endi O‘zbekistonning bankka a’zo bo‘lish uchun arizasi kelib tushgan bo‘lsa, O‘zbekistonning bankdagi ishtiroki taxminan 10 foizni tashkil qiladi. Umid qilamizki, bu yil kirishning barcha qonuniy masalalari hal qilinadi. Bu diversifikatsiya bo‘lib, bu, albatta, bankimizdagi ishtirokchilar, aksiyadorlar ulushlaridagi o‘zgarishlarga mutanosib ravishda ta’sir qiladi”, — dedi u.
Shuningdek, bank boshqaruvi raisi Nikolay Podguzov 2026-yilgacha YeOTB investitsiyalarining umumiy hajmi qariyb 11 milliard dollarni tashkil etishini aytdi.
Ma’lumot uchun, O‘zbekistonni va Xitoyni YeOTBda ko‘rish istagi 2018-yildayoq bildirilgan edi. 2021-yilda Yevropa taraqqiyot banki O‘zbekiston va YeOII integratsiyasining istiqbollari va potensial oqibatlari to‘g‘risidagi hisobotini taqdim etdi. Bank tahlilchilari ta’kidlaganidek, respublika har yili YeOIIdan 1,5 milliard dollargacha infratuzilma investitsiyalarini jalb qilish, eksport va migrantlar pul o‘tkazmalari oqimini oshirish imkoniyatiga ega bo‘ladi.
Yevroosiyo taraqqiyot banki (YeOTB) — Yevroosiyo makonida investitsiya faoliyatini amalga oshiruvchi ko‘p tomonlama rivojlanish banki hisoblanadi. 18-yildan ortiq vaqt mobaynida u o‘z a’zolari bo‘lgan mamlakatlarning iqtisodiy aloqalarini mustahkamlash va kengaytirishga, har tomonlama rivojlanishiga ko‘maklashib kelmoqda. YeOTBning ustav kapitali 7 milliard dollarni tashkil etadi. YeOTB portfelidagi asosiy ulushni transport infratuzilmasi, raqamli tizimlar, yashil energiya, qishloq xo‘jaligi, sanoat va mashinasozlik sohalarida integratsiya effektiga ega bo‘lgan loyihalar egallaydi.