TOShKENT, 24-iyun — Sputnik. Shu yil boshidan buyon Shimoliy Orol dengiziga 1,1 milliard kub metr suv kelib tushdi. Bu haqda Qozog‘iston suv xo‘jaligi va irrigatsiya vazirligi ma’lum qildi, deb yozmoqda Sputnik Qozog‘iston.
“Bugungi kunda Shimoliy Oroldagi suv hajmi 21,4 milliard kub metrni tashkil etadi”, — deyiladi xabarda.
Qozog‘iston, Qirg‘iziston, Tojikiston, Turkmaniston va O‘zbekistonni o‘z ichiga olgan Davlatlararo muvofiqlashtiruvchi suv komissiyasining 86-yig‘ilishida tomonlar irrigatsiya mavsumida Shimoliy Orol dengiziga 997 million kub metr suv quyilishi, suv oqimi esa soniyasiga kamida 30 kub metrni tashkil etishi haqida kelishib olishgan, deya eslatdi vazirlik.
“Hozir sekundiga 50 kub metr suv dengizga tushmoqda, bundan bir yil oldin suv oqimi soniyasiga 6 kub metrni tashkil etgan”, — deyiladi xabarda.
Avvalroq Qozog‘istonda Shimoliy Orol dengizini janubdan ajratib turgan Ko‘karal to‘g‘oni qurilishi yakunlangan. To‘g‘on Shimoliy Orol dengizi suv sathini ko‘tarish imkonini berdi. To‘g‘on foydalanishga topshirilgan paytdan boshlab bugungi kunga qadar Sirdaryodan Shimoliy Orol dengiziga 46,6 milliard kub metr suv quyilgan.
“Oxirgi 7-yil ichida dengizga 13,3 milliard kub metr suv tushdi. So‘nggi yillarda Shimoliy Orolda suv hajmi kamayib borayotgan bo‘lsa, 2024-yil boshidan buyon yana o‘sishni boshladi va bugungi kunda 21,4 milliard kub metrga yetdi”, — dedi vazirlik rasmiy vakili Moldir Abdualiyeva.
Vazirlik shuningdek, Sirdaryo oqimining 75 foizi Qirg‘iziston, 20 foizi O‘zbekiston va 5 foizi Qozog‘istonga to‘g‘ri kelishini eslatib o‘tdi.