TOShKENT, 4-iyun — Sputnik. Shimoliy Atlantika alyansi Rossiya bilan urush bo‘lgan taqdirda AQShdan Yevropaga qo‘shinlarni o‘tkazish rejasini tayyorlamoqda. Bu haqda Britaniyaning "Telegraph" gazetasi manbalarga tayanib xabar berdi, deb yozmoqda RIA Novosti.
“NATO Yevropada Rossiya bilan yirik quruqlik urushi yuz bergan taqdirda amerikalik askarlari va zirhli texnikalarini jadallik bilan frontga olib chiqish uchun bir nechta “quruqlik yo‘laklari” ustida ishlamoqda”, — deyiladi xabarda.
Taxminlarga ko‘ra, AQSh Qurolli kuchlari oldindan belgilangan beshta portdan biriga joylashadi va keyin tayyorlangan logistika marshrutlari bo‘ylab o‘tkaziladi, deya aniqlik kiritdi nashr suhbatdoshlari.
Gazetaga ko‘ra, NATO Amerika qo‘shinlarini Niderlandiyaga tushirishni rejalashtirmoqda, u yerdan ular temir yo‘l orqali Germaniya orqali Polshaga yetkaziladi. Alyans Norvegiya, Italiya, Gretsiya, Turkiya, Shvetsiya, Finlyandiya va Boltiqbo‘yi mamlakatlari portlarini ham jalb qilmoqchi.
Yaratilgan transport yo‘laklarida qo‘shinlar “odatda qo‘yiladigan cheklovlarsiz” harakatlana oladi, deyiladi materialda.