TOShKENT, 23-may — Sputnik. O‘tgan yilda Shanxay Hamkorlik Tashkilotiga (ShHT) a’zo mamlakatlar razvedka xizmatlari tomonidan 181 ta teraktning oldi olindi, 214 nafar xorijlik jangchi qo‘lga olindi, terrorchilik tashkilotlarining 95 ta yacheykasi faoliyati to‘xtatildi. Bu haqda ShHT Mintaqaviy aksilterror tuzilmasi (MATT) ijroiya qo‘mitasi direktori Ruslan Mirzayev ma’lum qildi.
Toshkentda O‘zbekiston raisligida Shanxay hamkorlik tashkilotiga a’zo davlatlar Oliy sudlari raislarining o‘n to‘qqizinchi yig‘ilishi bo‘lib o‘tmoqda. Unda Ruslan Mirzayev so‘zga chiqdi.
“2023 yil yakuniga ko‘ra ShHTga a’zo davlatlarning vakolatli organlarining birgalikdagi faoliyati jarayonida, jumladan, tezkor axborot almashish orqali terrorchilik tashkilotlarining 95 ta yacheykasi faoliyatiga chek qo‘yildi, 181 ta teraktning oldi olindi, ekstremistik va terroristik xarakterdagi 2010 ta jinoyat aniqlanib, ularga chek qo‘yildi”, — dedi u
Uning so‘zlariga ko‘ra, tashkilotga a’zo davlatlar razvedka xizmatlari 2023-yilda ham 214 nafar chet ellik jangari va 1185 nafar xalqaro terrorchilik tashkilotlariga a’zo va hamkorlarni aniqlab, qo‘lga olgan.
Terrorchilik va ekstremistik maqsadlarda foydalanilgan 13 ta moliyalashtirish va 26 ta noqonuniy migratsiya kanallari aniqlangan.
Qayd etilishicha, 2023-yilda ShHT mamlakatlarida qurol-yarog‘ va o‘q-dorilarning noqonuniy savdosining 14 ta kanali aniqlangan, 1589 ta o‘qotar qurol, 777 ta portlovchi moslama, 188 kilogramm portlovchi moddalar va 660 tonnadan ortiq narkotik moddalar musodara qilingan.
Eslatib o‘tamiz, shu yilning mart oyida Toshkentda ShHT Mintaqaviy aksilterror tuzilmasi (MATT) Kengashining 41-majlisi bo‘lib o‘tgan edi. Unda so‘zga chiqqan ShHT MATT ijroiya qo‘mitasi direktori Ruslan Mirzayev Shanxay hamkorlik tashkiloti Mintaqaviy aksilterror tuzilmasi salohiyatini oshirish zarurligini aytgan edi.