TOShKENT, 13-may — Sputnik. O‘zbekiston uy-joy bozoridagi faollik aprel oyida o‘sdi. Bu haqda Iqtisodiy tadqiqotlar va islohotlar markazi xabar berdi.
Qayd etilishicha, mart oyidagi biroz pasayishdan so‘ng aprel oyida vaziyatning yaxshilanishi qayd etildi: bozorga faollik qaytmoqda - bitimlar soni ortmoqda. Ijara bozori, aksincha, pasayish dinamikasini ko‘rsatdi.
Shunday qilib, aprel oyida bitimlar soni 11,2 foizga oshib, savdolar 20 mingta bitimni tashkil etdi.
“Biroq aprel oyidagi natija o‘tgan yilgi darajadan past bo‘ldi: yildan yilga sotuvlar hajmi 2% ga kamaydi”, — deyiladi xabarda.
Hududiy uy-joy bozori
Hududlar bo‘yicha ko‘chmas mulk bozoridagi faollikning eng katta o‘sishi Navoiy va Sirdaryo viloyatlarida 24 va 22,3% ga hamda Qoraqalpog‘iston Respublikasida 23,5% ga qayd etildi.
Poytaxtning uy-joy bozorida bitimlar soni oy davomida 6,5%ga oshdi.
Toshkentda uy-joy ijarasi
Aprel oyida poytaxtning ijara bozori yana pasayish dinamikasini ko‘rsatdi. Xarid qilish faolligi 4,6% ga kamaydi va 1 kvadrat metr uy-joy narxi 8,3 dollarni tashkil etdi.
Mirobod, Shayxontohur va Yakkasaroy tumanlarida ijara haqi hali ham yuqori, bu yerda har kvadrat metr uchun o‘rtacha ijara haqi 10,4 dollarni tashkil etadi.
Olmazor, Sergeli va Bektemir tumanlarida nisbatan arzon ijara uy-joylari saqlanib qolmoqda, bu hududlarda o‘rtacha ijara narxi har kvadrat metr uchun 6,3 dollarni tashkil etadi.
Shu bilan birga, o‘tgan yilning aprel oyiga nisbatan Toshkentda ijara bozori 6,9% ga qisqargan. Shunday qilib, narxlarning eng ko‘p pasaygan hududlar Yashnobod 11,6%, Yakkasaroy 11,1% va Shayxontohur 10,5% bo‘ldi.
Ikkilamchi uy-joy bozori
Aprel oyida ikkilamchi uy-joy narxi 0,7% ga biroz pasaydi, yillik ko‘rsatkichlarda esa ikkilamchi uy-joy narxi 11,6% ga oshdi.
Ikkilamchi uy-joy narxlarining eng yuqori o‘sishi qayd etilgan hududlar Toshkent – 23,6%, Buxoro – 21,3% va Xorazm-20,5% viloyatlari bo‘ldi.
“O‘z navbatida, poytaxtda ikkilamchi uy-joy narxlarining o‘sishi tezlashdi. Mart oyida Toshkent shahrida ikkilamchi uy-joylarning o‘rtacha narxi atigi 0,2% ga oshgan bo‘lsa, aprel oyida mos ravishda 1,1% ga oshgan”, – deyilgan xabarda.
Narx o‘sishining eng yuqori sur’atlari Bektemir – 3,8%, Yakkasaroy – 3,6% va Chilonzor – 3,1% tumanlarida qayd etildi.
Umuman olganda, yil davomida Toshkentda ikkilamchi uy-joylarning o‘rtacha narxi qariyb 13% ga oshdi.
Eslatib o‘tamiz, fevral oyida ko‘chmas mulk bozorida faollik biroz o‘sishidan so‘ng mart oyida sezilarli pasayish qayd etilgandi.