TOShKENT, 24 mar — Sputnik. O‘zbekiston siyosatchilari “Krokus”dagi terakt munosabati bilan Rossiya xalqiga hamdardlik bildirdi. Bu haqda Rossiya Federatsiyasi elchixonasi xabar berdi.
Qayd etilishicha, Oliy Majlis Senati raisining birinchi o‘rinbosari Sodiq Safoyev va Qonunchilik palatasi spikeri Nuriddin Ismoilov boshchiligidagi delegatsiyalar Rossiyaning O‘zbekistondagi elchixonasiga qo‘llab-quvvatlash so‘zlarini yetkazish uchun tashrif buyurishdi.
Ular orasida Qonunchilik palatasi spikerining birinchi o‘rinbosari Akmal Saidov, O‘zbekiston Xalq demokratik partiyasi fraksiyasining rahbari Ulug‘bek Inoyatov, deputatlar Dilorom Fayziyeva va Ilhom Abdullayevlar ham bor.
Shuningdek, O‘zbekiston tashqi ishlar vaziri Baxtiyor Saidov, Ozarbayjon, Qozog‘iston va Tojikistonning O‘zbekistondagi elchilari ham Moskvadagi terakt munosabati bilan hamdardlik bildirishdi.
Ular hamdardlik kitobiga o‘z so‘zlarini yozib qoldirishdi.
Eslatib o‘tamiz, juma kuni kechqurun Moskva shimoli-g‘arbidagi "Krokus Siti Xoll" konsert zalida otishma bo‘lib o‘tdi. Rossiya Tergov qo‘mitasi terakt yuzasidan jinoiy ish qo‘zg‘atdi.