TOShKENT, 15 mar — Sputnik. Bugun, 15-mart kuni, Rossiya prezidenti saylovlarida ovoz berish boshlandi, u uch kun davom etadi, asosiy ovoz berish kuni esa 17-martda bo‘lib o‘tadi. Bu haqda RIA Novosti xabar berdi.
Rossiya Federatsiyasi Konstitutsiyasiga ko‘ra, prezident Rossiya fuqarolari tomonidan umumiy, teng va to‘g‘ridan-to‘g‘ri saylov huquqi asosida yashirin ovoz berish orqali olti yilga saylanadi. Dekabr oyida Federatsiya Kengashi prezidentlik saylovini 2024-yil 17-martga belgilagan edi. Ovoz berish uch kun davom etadi: 15, 16 va 17-mart.
Bu ko‘p kunlik ovoz berish formati qo‘llaniladigan birinchi prezidentlik saylovidir. Markaziy saylov komissiyasi raisi Ella Pamfilovaning so‘zlariga ko‘ra, ko‘p kunlik ovoz berish saylovchilar uchun qulay amaliyot bo‘lgani uchun fuqarolarning o‘z murojaatlari asosida bunday qaror qabul qilingan. Markaziy saylov komissiyasiga prezidentlik sayloviga tayyorgarlik ko‘rish va uni o‘tkazish uchun 33,2 milliard rubl ajratildi.
Pamfilova o‘z chiqishlarida bo‘lajak saylovlar muhimligini bir necha bor ta’kidladi. Uning so‘zlariga ko‘ra, saylovlar og‘ir, ekstremal vaziyatda, zaharli xalqaro muhit yaratilgan, shuningdek, “doimiy tahdidlar va boshqa ko‘plab salbiy hodisalar davrida” o‘tmoqda.
Saylovlarda to‘rt nafar nomzod – “Novie lyudi” partiyasi tomonidan ko‘rsatilgan Davlat Dumasi spikeri o‘rinbosari Vladislav Davankov, LDPR yetakchisi Leonid Sluskiy va Kommunistik partiya Markaziy qo‘mitasi Prezidiumi a’zosi Nikolay Xaritonov, shuningdek, amaldagi prezident Vladimir Putin o‘zini o‘zi ko‘rsatgan nomzod sifatida kurashmoqda.
Rossiya bo‘ylab 94 mingdan ortiq saylov uchastkalari o‘z eshiklarini ochadi. Saylovchilar soni 112 mlndan ortiqni tashkil qiladi.