TOShKENT, 24 fev — Sputnik. 22 fevral kuni Ostona shahrida Qozog‘istonning “Atameken” Milliy tadbirkorlar palatasi maydonida Yevroosiyo iqtisodiy komissiyasi delegatsiyasining Qozog‘iston biznes jamiyati vakillari bilan uchrashuvi bo‘lib o‘tdi. Bu haqda YeIK saytida xabar berildi.
Uchrashuv YeIK Iqtisodiyot va moliya siyosati vaziri Baxit Sultanov raisligida o‘tkazildi.
“Ishbilarmon doiralar vakillari bilan uchrashuvlarni, ayniqsa, yuzma-yuz formatda o‘tkazish Komissiya va biznes o‘rtasidagi o‘zaro hamkorlikning juda samarali shakli bo‘lib, to‘g‘ridan-to‘g‘ri muloqot chog‘ida takliflar bilan bo‘lishish va tadbirkorlarni tashvishga solayotgan masalalarni muhokama qilish imkonini beradi”, - dedi Baxit Sultanov.
YeIK vaziri Yevroosiyo iqtisodiy ittifoqi to‘g‘risidagi shartnomaga tadbirkorlar muammolarini hal etish va ularning Yevroosiyo makonidagi integratsiya jarayonlarida ishtirok etish darajasini oshirishga qaratilgan o‘zgartirishlar haqida gapirdi.
YeIK tadbirkorlik faoliyatini rivojlantirish departamenti direktori Yernar Bakenov Qozog‘iston ishbilarmon doiralari vakillari tomonidan avvalgi uchrashuvlarda bildirilgan muammoli masalalarni hal etishning borishi va natijalari to‘g‘risidagi ma’lumotlarni taqdim etdi. Komissiya vakili tibbiy buyumlar muomalasini tartibga solish, texnik jihatdan tartibga solish, ichki bozorlar faoliyati, tovarlarning o‘zaro savdosida soliqqa tortish kabi masalalarni hal etishda erishilgan yutuqlar haqida gapirdi.
YeIK vakillari tadbirkorlarning savollariga javob berdilar va ular bildirgan muammolarni inobatga oldilar.
Uchrashuv yakunlari bo‘yicha ishbilarmon doiralar vakillarining dolzarb masalalari va muammolarini doimiy ravishda videokonferensiya o‘tkazish orqali doimiy monitoring va nazorat qilish bo‘yicha kelishuvga erishildi.