TOShKENT, 13 fev — Sputnik. O‘zbekiston va Qozog‘iston Usturt platosining hayvonot dunyosini asrab-avaylashda hamkorlik qiladi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Samarqandda bo‘lib o‘tgan CMS COP14 yalpi majlisi doirasida ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov va Qozog‘iston ekologiya va tabiat resurslari vaziri o‘rinbosari Nurken Sharbiyev o‘rtasida memorandum imzolandi.
“Memorandum doirasida Usturt platosida yovvoyi hayvonlarning transchegaraviy populyatsiyalari va ularning ko‘chib yuruvchi turlarini saqlashni ta’minlash bo‘yicha ishchi guruh tuziladi va chora-tadbirlarning “Yo‘l xaritasi” ishlab chiqiladi”, — deyiladi xabarda.
Hujjatda quyidagilar nazarda tutilgan:
ko‘chib yuruvchi turlarning muvofiqlashtirilgan monitoringi, tadqiqi va inventarizatsiyasi;
yovvoyi hayvonlarning ko‘chib yuruvchi turlarini muhofaza qilish va bioxilma-xillikni saqlash;
transchegaraviy muhofaza qilinadigan hududlar va migratsiya koridorlarini yaratish;
hayvonot dunyosi resurslaridan barqaror foydalanish va ekoturizmni rivojlantirish imkoniyatlarini o‘rganish;
mutaxassislar tayyorlash va malakasini oshirish;
ko‘chib yuruvchi turlarni saqlash sohasida zamonaviy va innovatsion texnologiyalarni tanlash va qo‘llash bo‘yicha maslahatlashuvlar;
ko‘chib yuruvchi hayvonlarni noqonuniy yoki asossiz tutishga, shu jumladan, brakonerlik va yovvoyi hayvonlar hamda ularning hosilalari kontrabandasiga qarshi kurashish bo‘yicha chora-tadbirlarni muvofiqlashtirish va kuchaytirish;
qo‘shma ilmiy-amaliy seminarlar va konferensiyalar o‘tkazish;
qo‘shma ilmiy va ilmiy-ommabop nashrlarni tayyorlash va chiqarish;
yashash muhitining parchalanishi va degradatsiyasining oldini olish choralari;
“Yo‘l xaritasi”ning tegishli chora-tadbirlarini amalga oshirish uchun investitsiyalar va mablag‘larni jalb qilish.
Kelishuv 2023-yilda Butunjahon tabiiy merosi obyektlari ro‘yxatiga kiritilgan “Turon mo‘’tadil cho‘llari” transmilliy Butunjahon tabiiy merosi obyektini saqlash bo‘yicha Markaziy Osiyo davlatlarining majburiyatlarini bajarish maqsadida imzolandi.
Ma’lumot uchun, Usturt platosi O‘rta Osiyoning g‘arbiy qismida uch davlat – O‘zbekiston, Qozog‘iston va Turkmaniston hududida joylashgan. Hudud notekis relyefli, og‘ir ob-havo sharoitlari va turli xil ekotizimlarga ega.
Anglashuv memorandumi platoda ekologik muhim hayvonlar migratsiyasini himoya qiladi. Imzolangan memorandumning bir qismi sifatida yovvoyi sutemizuvchilar omon qolish, ko‘payish va migratsiya yo‘li bilan tarqalish jarayonida chegaralarni erkin kesib o‘tishlari kerak. O‘zbekiston va Qozog‘iston o‘rtasidagi hamkorlik to‘g‘risidagi memorandum hayvonlarni muhofaza qilish doirasidan tashqariga chiqadi va hukumatlararo ekologik yechimlarni namoyish etadi.