TOShKENT, 2 fev — Sputnik. Jahon sog‘liqni saqlash tashkiloti (JSST) onkologik kasalliklar bo‘yicha o‘tkazilgan yangi tadqiqot natijalarini e’lon qildi. Unda qayd etilishicha, 2050-yilga kelib, dunyoda saratonga chalinish ko‘rsatkichlari yiliga 20 milliondan 35 million holatga ko‘payishi mumkin.
Ta’kidlanishicha, o‘sish dinamikasiga ta’sir ko‘rsatuvchi qator omillar mavjud. Ular orasida tamaki iste’moli, spirtli ichimliklar, semirish va havo ifloslanishi asosiy o‘rinni egallaydi.
Xususan, hisobotda inson taraqqiyoti indeksi juda yuqori bo‘lgan mamlakatlarda har 12 ayoldan biri ko‘krak bezi saratoniga chalinishi prognoz qilingan. Shuningdek, har 71 nafar bemor ayoldan biri bu xastalik oqibatida vafot etadi.
Inson taraqqiyoti indeksi past davlatlarda esa vaziyat boshqacharoq tus olishi mumkin. Ya’ni, har 27 ayoldan biriga ko‘krak bezi saratoni tashxisi qo‘yilib, 48 nafar bemordan biri hayotdan ko‘z yumadi.
Eslatib o‘tamiz, 2022-yilda Yer sayyorasi bo‘yicha 20 milliondan ortiq saratonga chalingan bemor va 10 millionga yaqin o‘lim holatlari qayd etildi. Onkologik kasalliklardan o‘lim sabablari orasida o‘pka saratoni yetakchilik qilgan — 18,7 foiz. Bu dard 1,8 million kishining hayotiga zomin bo‘ldi.