TOShKENT, 30 yanv — Sputnik. Shu yilning fevral oyida Dohada Birlashgan Millatlar Tashkiloti (BMT) bosh kotibi Antoniu Guterrish raisligida Afg‘oniston bo‘yicha yig‘ilish bo‘lib o‘tadi. Bu haqda O‘zbekiston Tashqi ishlar vazirligi matbuot xizmati xabar berdi.
O‘zbekiston prezidentining Afg‘oniston bo‘yicha maxsus vakili Ismatulla Irgashev va Buyuk Britaniya bosh vazirining Afg‘oniston va Pokiston bo‘yicha maxsus vakili Endryu Makkubri o‘rtasida videokonferensaloqa shaklida muzokaralar bo‘lib o‘tdi.
“Uchrashuvda Afg‘oniston bo‘yicha maxsus vakillarning joriy yilning fevral oyida Qatar poytaxti Doha shahrida BMT bosh kotibi A.Guterrish raisligida bo‘lib o‘tadigan uchrashuviga alohida e’tibor qaratildi”, — deyiladi xabarda.
Har ikki tomonning fikricha, ushbu tadbir jahon hamjamiyatining Afg‘onistondagi vaziyatni barqarorlashtirish bo‘yicha samarali yechimlarni topish borasidagi harakatlarini muvofiqlashtirish, shuningdek, afg‘on xalqiga insonparvarlik yordami ko‘rsatishda muhim ahamiyat kasb etadi.