TOShKENT, 24 yanv — Sputnik. O‘zbekiston Eronda saqlanayotgan o‘zbek xalqiga tegishli tarixiy hujjatlarni aniqlaydi, deya xabar berdi Fanlar akademiyasi.
Tarix instituti direktori, akademik Azamat Ziyo Eronning O‘zbekistondagi elchisi Muhammadali Iskandariy bilan muzokaralar o‘tkazdi. Unda ikki mamlakat tarixchilari o‘rtasida samarali aloqalarni yo‘lga qo‘yish, ilmiy tadbirlar tashkil etish masalasi ko‘rib chiqildi.
Uchrashuvda quyidagilar muhokama qilindi:
Eronda saqlanayotgan, o‘zbek xalqi va davlatchiligi tarixiga doir manbalar, hujjatlarni aniqlash va ilmiy muomalaga kiritish;
qo‘lozmalarni o‘qish salohiyatiga ega tarixchi mutaxassislarni tayyorlash;
tegishli ilmiy adabiyotlar, dissertatsiyalar, manbalarning elektron shaklini Tarix institutiga taqdim etish;
qo‘shma ilmiy loyihalarni amalga oshirish.
Shuningdek, kelgusi rejalar bo‘yicha "yo‘l xaritasi" tuzib, aniq natijaga ishlash yuzasidan kelishib olindi.
Ma’lumot uchun, hozirda O‘zbekistonda ilmiy faoliyat bilan shug‘ullanayotgan 30 mingdan ortiq tadqiqotchilarning yarmidan ortig‘ini aynan yoshlar tashkil etadi.