TOShKENT, 16 noya — Sputnik. O‘zbekiston Milliy gvardiyasi va Turkiya Jandarmeriyasi qator kelishuvlarga erishdi. Bu haqida Milliy gvardiya xalqaro hamkorlik boshqarmasi xabar berdi.
Turkiya respublikasi Jandarmeriyasi bosh qo‘mondoni o‘rinbosari general-polkovnik Huseyn Kurtog‘lu boshchiligidagi delegatsiyasi O‘zbekistonga keldi. Uchrashuvda O‘zbekiston va Turkiya o‘rtasida harbiy ta’lim sohasida hamkorlik istiqbollari muhokama qilindi.
Turkiya Jandarmeriyasi O‘zbekistonga keldi
© Natsionalnaya gvardiya respubliki Uzbekistan
“O‘tkazilgan muzokaralar natijasida O‘zbekiston Milliy gvardiyasi va Turkiya Jandarmeriyasi harbiy xizmatchilarining professional malakasini oshirish, ularni tayyorlash va qayta tayyorlash masalalari borasida qator kelishuvlarga erishildi”, — deyiladi xabarda.
Delegatsiya a’zolari Jamoat xavfsizligi universiteti, Milliy gvardiya Ma’naviyat va ma’rifat markazi, Bolalar psixologiyasi markazi, Axborot xizmati faoliyati, “Temurbeklar” harbiy akademik litseyi va Kavaleriya eskadroniga tashrif buyurishdi.
Turkiya Jandarmeriyasi O‘zbekistonga keldi
© Natsionalnaya gvardiya respubliki Uzbekistan
Ma’lumot uchun, 2021-yilning noyabr oyida O‘zbekistonga ilk bor Turkiya Jandarmeriyasi bosh qo‘mondoni armiya-generali Arif Chetinning tashrifi bo‘lib o‘tgan. Tashrif davomida O‘zbekiston Milliy gvardiyasi va Turkiya Jandarmeriyasi o‘rtasida hamkorlik aloqalarini mustahkamlash va rivojlantirish to‘g‘risida kelishilgan.