TOShKENT, 19 okt — Sputnik. AQSh prezidenti Jo Bayden Isroilga tashrifini mojaro keskinlashining oldini olish uchun Yaqin Sharqda vositachilik qilishga urinish sifatida rejalashtirgan edi. “El País” gazetasi Bayden muvaffaqiyatsizlikka uchradi deb hisoblamoqda.
Nashrning aniqlik kiritishicha, Amerika rahbari Isroilga tashrifdan natija bo‘lishiga umid qilgan. Bayden hozir barbod bo‘lish arafasida turgan Yaqin Sharqqa nisbatan o‘z siyosatini himoya qilishga ham uringan. Gazetaning yozishicha, AQSh prezidentining Isroilga bosim o‘tkazishga urinishi yoki uning arab yetakchilari bilan muloqotlari, aftidan, mintaqadagi keskinlikni susaytirmagan. BMT Xavfsizlik Kengashining o‘t ochishni bas qilishga chaqiruvchi rezolyutsiyasiga AQSh qo‘ygan veto vaziyatni yanada taranglashtirgan.
Amerikaning Isroilni qo‘llab-quvvatlashi tez orada boshlanishi kutilayotgan to‘laqonli saylov kampaniyasi arafasida Bayden uchun qiyinchiliklar keltirib chiqarishi ham mumkin.
18 oktabr kuni Oq uy rahbari Isroilga bir kunlik tashrif bilan keldi. Bayden Tel-Avivda mamlakatning harbiy-siyosiy rahbariyati, jumladan, bosh vazir Binyamin Netanyaxu bilan uchrashdi.
Amerika yetakchi Isroildan keyin Ammon shahriga borishi va u yerda Iordaniya qiroli Abdulla II hamda Falastin prezidenti Mahmud Abbos va Misr yetakchisi Abdulfattoh as-Sisi bilan muzokaralar o‘tkazishi rejalashtirilgan edi. Ammo G‘azo shahridagi al-Ahli kasalxonasiga zarba berilgandan keyin bu uchrashuv bekor qilindi.