TOShKENT, 10 okt — Sputnik. O‘zbekiston Afg‘onistonga qariyb 100 tonna insonparvarlik yordami yubordi, deya xabar berdi Transport vazirligi.
Bugun O‘zbekiston zilziladan jabr chekkan qo‘shni Afg‘oniston xalqiga insonparvarlik yordami yubordi. Insonparvarlik yordami O‘zbekiston prezidentining Afg‘oniston bo‘yicha maxsus vakili Ismatilla Irgashev boshchiligida yetkazildi.
"Yuborilgan yordam yuki tarkibida oziq-ovqat mahsulotlari: un, bug‘doy, yog‘, makaron, go‘sht mahsulotlari, guruch, shakar; chodir va odeyallar, shuningdek birlamchi tibbiy yordam uchun zaruriy barcha vositalar bor", — deyiladi xabarda.
Yordam yuki My Freighter aviakompaniyasining Boeing-747 yuk samolyotida Hirot shahriga yetkazib berildi.
Eslatib o‘tamiz, 7-oktabr kuni Afg‘oniston g‘arbidagi Hirot viloyatida 6,3 magnitudali zilzila sodir bo‘ldi.