TOShKENT, 28 sen — Sputnik. Toshkent shahri Sergeli tumanida sodir bo‘lgan portlash oqibatida zarar ko‘rgan fuqarolarn 1205 qisqa raqamiga murojaat etishlari mumkin. Bu haqda poytaxt hokimligi xabar berdi.
Qayd etilishicha, bugun tunda sodir bo‘lgan yong‘inni to‘liq bartaraf etish hamda jarohatlanganlarga yordam berish barobarida, favqulodda hodisa oqibatida yetkazilgan zararni baholash va bosqichma-bosqich qoplash yuzasidan ishlar boshlandi.
"Hozirda, mol-mulkiga zarar yetgan fuqarolarning murojaatlari 1205 qisqa raqami orqali qabul qilinmoqda", — deyiladi xabarda.
Eslatib o‘tamiz, bugun, 28-sentabr kuni soat 02:43 da Toshkent shahrining Sergeli tumanida “Inter Logistics” kompaniyasi omborida kuchli portlash sodir bo‘ldi.
Sergelidagi portlashdan keyin 30 ga yaqin odam Respublika shoshilinch tibbiy yordam markaziga yotqizilgan. Bu haqda favqulodda vaziyatlarda shoshilinch tibbiy yordamni tashkil etish bo‘yicha direktor o‘rinbosari Orif Inomov Sputnik muxbiriga xabar berdi.