TOShKENT, 9 sen — Sputnik. G20 davlatlarining yarmi Ukrainadagi voqealarni G‘arb manfaatlaridan kelib chiqib talqin qilishdan bosh tortdi. Bu haqda Rossiyaning G20 vakili sherpa Svetlana Lukash ma’lum qildi, deb yozadi RIA Novosti.
G20 deklaratsiyasi guruhning Ukraina bo‘yicha muvozanatli pozitsiyasini va butun dunyo bo‘ylab mojarolarni hal qilish niyatini aks ettiradi.
“Ukraina voqeasi bo‘yicha aytishim mumkinki, juda og‘ir muzokaralar bo‘ldi va birinchi navbatda BRIKS mamlakatlari va boshqa sheriklarning jamoaviy pozitsiyasi ish berdi”, - dedi Lukash jurnalistlarga.
Lukashning so‘zlariga ko‘ra, G20 davlatlarining yarmi Ukrainadagi voqealarni G‘arb manfaatlaridan kelib chiqib talqin qilishdan bosh tortgan.
"Ukraina mojarosi oziq-ovqat xavfsizligi bilan bog‘liq vaziyatning yomonlashuviga sabab bo‘layotgani haqida yil davomida eshitgan narsamiz endi muvozanatli shaklda aks etmoqda", - deya qo‘shimcha qildi Lukash.
U shuningdek, deklaratsiya "konsensus tili"ga erishganini ta’kidladi.
"Biz barchamiz G20 a’zolari sifatida butun dunyo bo‘ylab tinchlik, xavfsizlik va nizolarni hal qilish manfaatlari yo‘lida yagona tarzda harakat qilishga kelishib oldik", - deya qo‘shimcha qildi u.
Eslatib o‘tamiz, Hindiston 2022-yil 1-dekabrdan boshlab G20ga raislik qilmoqda.Guruh yetakchilari sammiti 9-10 sentabr kunlari Nyu-Dehlida bo‘lib o‘tadi. G20 davlatlari va yana to‘qqizta davlat – Bangladesh, Misr, Ispaniya, Mavrikiy, Nigeriya, Niderlandiya, BAA, Ummon va Singapur rahbarlari ishtirok etishga taklif etilgan.