TOShKENT, 5 sen — Sputnik. O‘zbekiston elchisi Ravshan Usmanov Malayziya transport vaziri Lok Syu Fuk bilan uchrashuv o‘tkazdi. Bu haqda “Dunyo” AA xabar berdi.
Malayziya transport vaziri O‘zbekiston hukumati tomonidan transport sohasini rivojlantirish bo‘yicha olib borilayotgan islohotlarni, ushbu yo‘nalishdagi yirik loyihalar, xususan "O‘zbekiston – Afg‘oniston – Pokiston" avtomobil yo‘nalishi va ushbu ikki davlat orqali Hind okeani portlariga chiqish uchun xalqaro transport koridorini shakllantirish bo‘yicha vazifalarni yuqori baholadi.
Muloqot davomida tomonlar O‘zbekiston va Malayziya o‘rtasida transport sohasida o‘zaro hamkorlik istiqbollarini muhokama qildi. Jumladan, aviaqatnovlar va temir yo‘l yo‘nalishida hamkorlikni rivojlantirish masalalari bo‘yicha fikr almashildi.
Xususan, xorij tomoni Malayziyaning "Batik Air" aviakompaniyasi tomonidan joriy yilning noyabridan Kuala-Lumpur – Toshkent – Kuala-Lumpur yo‘nalishida haftasiga uch marta amalga oshirilishi rejalashtirilgan aviaqatnovlarni olqishladi.
Uchrashuv yakunida "Batik Air" va "Uzbekistan Airports" AJ o‘rtasidagi muzokaralarni jadallashtirish hamda joriy yilning noyabr oyidan boshlab mazkur Malayziya aviakompaniyasining O‘zbekiston yo‘nalishidagi aviaqatnovlarini yo‘lga qo‘yish, O‘zbekiston Transport vazirligi mutaxassislarining Malayziyaning ilg‘or tajribasini o‘rganish bo‘yicha Kuala-Lumpurga ishchi safarini ishlab chiqish to‘g‘risida kelishib olindi.