TOShKENT, 30 avg — Sputnik. Gabonda amaldagi davlat rahbari Ali Bongo Ondimba saylovda g‘alaba qozongani e’lon qilingandan bir oz vaqt o‘tib harbiylar guruhi hokimiyat tepasiga kelgani va ovoz berish natijalarini bekor qilishganini ma’lum qilishdi.
Isonchilar orasida xavfsizlik xizmati, milliy va prezident gvardiyasi, armiya va politsiya vakillari bor.
Hokimiyatni qo‘lga olgan harbiylar mamlakat chegaralari navbatdagi buyruqqa qadar yopilishi e’lon qilishdi. Isonchilar barcha davlat organlarini tarqatib yuborishdi: hukumat, Senat, Milliy assambleya, Konstitutsiyaviy sud. Isonchilar O‘tish davri va organlarni qayta tiklash bo‘yicha qo‘mita tuzishdi. Uning tarkibi hozircha e’lon qilinmagan.
Harbiylar Gabonning xalqaro majburiyatlariga rioya qilinishini ta’kidlashmoqda. Ular aholini tinchlanishga chaqirishgan. O‘z xatti-harakatlari sabablarini tushuntirayotib, ular “mas’uliyatsiz, oldindan bilib bo‘lmaydigan boshqaruv” mamlakatni xaosga cho‘mdirishi mumkinligi, shu bois ular “hozirgi rejimni tugatib, tinchlikni himoya qilishga” qaror qilishganini ma’lum qilishgan.
AFP agentligining yozishicha, 2009-yildan buyon mamlakatni boshqarib kelayotgan Gabon prezidenti Ali Bongo Ondimba uy qamog‘ida olingan. U otasi Umar Bongo vafotidan keyin Gabon prezidenti etib saylangan edi.
Gabon poytaxti Librevil hamda kattaligi bo‘yichi ikkinchi o‘rinda bo‘lgan Port-Jantil aholisi ko‘chalarga mamlakat bayrog‘ini ko‘tarib chiqib, tanklardagi harbiylarni olqishladi.
Gabon aholisi
© AFP 2023
Avvalroq OAV Librevilda otishma sadolari eshitayotganini xabar qilgan edi.
Mamlakatda uch kunlik tanaffusdan keyin internet yana paydo bo‘lgan.
Moskva do‘st Gabonda vaziyat keskinlashganidan xavotirda ekanini ma’lum qildi va mamlakatdagi vaziyat tez orada izga tushishiga umid bildirdi.
Gabon Afrikaning iqtisodiy jihatdan eng barqaror davlatlaridan biri va mintaqa uchun yirik neft eksportchisi hisoblanadi. Mamlakatda 2,2 millionga yaqin aholi istiqomat qiladi.