TOShKENT, 23 avg — Sputnik. BRIKS davlatlari ittifoqni kengaytirish bo‘yicha kelishuvga erishdi, dedi Ubuntu Radio efirida Janubiy Afrika tashqi ishlar vaziri Naledi Pandor.
“Biz kengayish masalasida kelishib oldik, BRIKSga a’zo bo‘lishni xohlovchi davlatlarni ko‘rib chiqish tamoyillari, jarayonlarini belgilab beruvchi hujjat qabul qildik”, — dedi u.
Ma’lumot uchun, bugungi kunda BRIKS besh davlatni birlashtiradi: Braziliya, Rossiya, Hindiston, Xitoy va JAR. O‘z navbatida, 23 davlat iqtisodiy blokka qo‘shilish istagini bildirgan - Jazoir, Argentina, Bangladesh, Bahrayn, Belarus, Boliviya, Kuba, Misr, Efiopiya, Gonduras, Indoneziya, Eron, Qozog‘iston, Kuvayt, Marokash, Nigeriya, Falastin, Saudiya Arabistoni, Senegal, Tailand, BAA, Venesuela va Vetnam.
2022 yilda BRIKS tashkilotni yanada inklyuziv qilish uchun a’zo davlatlar sonini kengaytirishini e’lon qildi. O‘shanda ittifoqqa kamida 19 davlat a’zo bo‘lishni xohlagan edi.
Janubiy Afrikaning Moskvadagi elchisi Mzuvukile Maketuka RIA Novosti agentligiga bergan intervyusida aytganidek, assotsiatsiyaning barcha a’zolari kengayishni ma’qullaydi, ammo yangi a’zolarni qabul qilish usullarini aniqlash zarur, bu masalani birgalikda hal qilish kerak.
22-24 avgust kunlari JARning Yoxannesburg shahrida BRIKS sammiti bo‘lib o‘tmoqda. Unda Xitoy, Hindiston, Braziliya va Janubiy Afrika davlatlari rahbarlari ishtirok etmoqda. Rossiya tomonidan tashqi ishlar vaziri Sergey Lavrov ishtirok etmoqda. Prezident Vladimir Putin sammitda videokonferensiya orqali ishtirok etishini ma’lum qildi.