TOShKENT, 9 avg — Sputnik. "Alibaba" platformasi orqali savdo qiladigan o‘zbekistonlik tadbirkorlar soni oshiriladi. Bu haqda Qishloq xo‘jaligi vazirligi xabar berdi.
Qishloq xo‘jaligi vaziri Aziz Voitov “Alibaba group” strategik rivojlanish bo‘yicha vitse-prezidenti Kris Zou bilan uchrashdi. Unda “alibaba.com” savdo platformasi bilan hamkorlikni yanada rivojlantirish masalalari ko‘rib chiqildi.
Qayd etilishicha, hozirda 118 ta oziq-ovqat, qishloq xo‘jaligi mahsulotlari, tekstil korxonalari va boshqa yo‘nalishdagi korxonalarning 8000 dan ortiq mahsulotlari Alibaba.com savdo bozorida sotilmoqda.
Vazirlik matbuot xizmati ma’lum qilishicha, yangi hamkorlik ularning sonini yanada oshirish maqsadida o‘rnatilmoqda.
“Hozirda muzokaralar davom etmoqda. Keyinchalik O‘zbekiston tomoni Xitoyga boradi. Shundan keyin savdo boshlanadigan aniq sana ma’lum bo‘ladi”, - dedi vazirlik matbuot xizmati rahbari Dilshod Nazarov Sputnik muxbiriga.
Ma’lumot uchun, kompaniya vakillari Raqamli texnologiyalar vaziri Sherzod Shermatov bilan ham uchrashishdi. Unda "Alibaba" kompaniyasi O‘zbekistondagi faoliyatini kengaytirishi muhokama etildi.
Eslatib o‘tamiz, "Alibaba" platformasida O‘zbekistonning milliy onlayn savdo maydoni ishga tushishi ma’lum qilingandi.