TOShKENT, 28-iyul — Sputnik. O‘zbekiston va Vengriya o‘zaro sayyohlik oqimini ko‘paytirish maqsadida viza olish tartibini soddalashtirishga kelishib oldi. Bu haqda iqtisodiy hamkorlik bo‘yicha O‘zbekiston-Vengriya hukumatlararo komissiyasining sakkizinchi yig‘ilishida ma’lum qilindi.
Investitsiyalar, sanoat va savdo vazirligi xabariga ko‘ra, yig‘ilish doirasida ikki mamlakatning 200 dan ortiq ishbilarmon va rasmiy doiralari vakillari ishtirokida biznes-forum ham bo‘lib o‘tdi.
O‘zbekiston delegatsiyasiga vazir Laziz Kudratov boshchilik qilgan. Kudratov Vengriya tashqi ishlar vaziri Petr Siyarto bilan muzokaralar chog‘ida savdo-iqtisodiy, investitsiyaviy va sanoat sohalarida hamkorlikning bugungi holati va uni rivojlantirish istiqbollarini muhokama qilgan.
“Tomonlar mamlakatlar o‘rtasidagi munosabatlarni faollashtirish maqsadida Toshkent va Budapesht shaharlari o‘rtasida to‘g‘ridan-to‘g‘ri aviaqatnovlarni yo‘lga qo‘yish, shuningdek, o‘zaro sayyohlik oqimining o‘sishiga ijobiy ta’sir ko‘rsatishi kutilayotgan viza tartib-taomillarini soddalashtirishga kelishib oldilar”, - deyilgan xabarda.
Bundan tashqari, tashrif doirasida Vengriyaning yetakchi kompaniyalari: “KESH”, “Gedeon Rixter”, “Meditop”, “Wizz Air”, “Bonafarm”, “Mall Group” va “Semmelweis University” rahbarlari bilan uchrashuvlar o‘tkazildi va ular davomida bir qator aniq kelishuvlarga erishildi.
Eslatib o‘tamiz, avvalroq avgust oyidan O‘zbekiston va Vengriya poytaxtlari o‘rtasida to‘g‘ridan-to‘g‘ri parvozlar boshlanishi xabar qilingan edi.