TOShKENT, 13 apr — Sputnik. Qashqadaryo viloyatining Shahrisabz shahrida “Hunarmand mikromarkazi” ishga tushdi. Bu haqda Sputnik muxbiriga Respublika hunarmand uyushmasi ma’lum qildi.
© Assotsiatsiya "Xunarmand"
Qayd etilishicha, Kulolchilik mahallasida joylashgan 4 ta bo‘sh turgan bino elektron auksion orqali hunarmandlarga ijara huquqi asosida berildi.
“Mikromarkazda jami 50 dan ortiq xotin-qizlar hunar o‘rganib, ish bilan ta’minlanmoqda. Quvonarlisi, mikromarkaz ishga tushgan joy shaharning tarixiy qismi bo‘lib, ko‘plab mahalliy va xorijiy sayyohlar tashrifi kuzatiladi”, - dedi Respublika “Hunarmand” uyushmasi axborot xizmati rahbari Nilufar Hotamova.
Markazda shogirdlarga milliy kashtachilik, do‘ppidozlik, so‘zana tikish, tikuvchilikning boshqa turlari, popirchilik, dizayn, baldoq yasash, zardo‘zlik kabi hunarlar o‘rgatilmoqda.
© Assotsiatsiya "Xunarmand"
Mikromarkazda usta hunarmandlar uchun 25-30 nafardan shogird tayyorlash bo‘yicha talablar ham qo‘yilgan. Hozirda Shahrisabz shahar "Hunarmand" boshqarmasi tashabbusi bilan “ustoz-shogird” an’anasi asosida hududdagi 30 dan ortiq hunarmandlarga 300 nafar shogirdlar biriktirilgan.
© Assotsiatsiya "Xunarmand"
Aytilishicha, kelgusida viloyatning boshqa hududlarida ham mikromarkazlar va savdo uylarini ochish rejalashtirilgan.