SAMARQAND, 13 apr — Sputnik. Bugun Samarqandda Afg‘onistonga qo‘shni davlatlar tashqi ishlar vazirlari konferensiyasi bo‘lib o‘tadi. Bu haqda Sputnik muxbiri xabar berdi.
Tadbirda O‘zbekiston, Rossiya, Eron, Xitoy, Pokiston, Tojikiston va Turkmaniston vakillari ishtirok etadi.
Uchrashuvda ishtirokchi davlatlar afg‘on masalasi bo‘yicha pozitsiyalarini solishtirishni rejalashtirgan. Xavfsizlik, terrorizm va Afg‘oniston hududidan narkotik moddalarning noqonuniy aylanishi tahdidlariga qarshi kurashish masalalariga alohida e’tibor qaratiladi.
O‘zbekiston TIV matbuot xizmatida ta’kidlanishicha, kun tartibiga inson huquqlariga rioya qilish va mamlakatning asosiy etnik-siyosiy kuchlari manfaatlarini aks ettiruvchi chinakam qamrab oluvchi hukumatni yaratish orqali Afg‘oniston ichidagi yarashuv jarayonini davom ettirish masalalari ham kiritiladi.
Uchrashuv Afg‘onistondagi gumanitar vaziyatni yaxshilash va Afg‘oniston iqtisodiyotini tiklash, jumladan, mintaqaviy infratuzilma loyihalarini rag‘batlantirish orqali sa’y-harakatlarni muvofiqlashtirish imkonini beradi.
Bu Afg‘oniston bo‘yicha vazirlarning to‘rtinchi uchrashuvidir. Afg‘onistonga qo‘shni davlatlar tashqi ishlar vazirlarining birinchi uchrashuvi 2021-yil sentabr oyida videokonferensiya formatida, ikkinchisi – 2021-yil oktabr oyida Tehronda, uchinchisi – 2022-yilning mart oyida Xitoyning sharqiy Anxuy provinsiyasidagi Tunsi shahrida bo‘lib o‘tgan.
Rossiya delegatsiyasiga tashqi ishlar vaziri Sergey Lavrov boshchilik qilmoqda. 12-aprel kuni u O‘zbekistonga keldi.