TOShKENT, 2 mar - Sputnik. Turkiya va Suriyada halokatli zilzila bo‘lishidan ogohlantirgan seysmolog Frank Xugerbits mart oyida Rossiyaning Uzoq Sharqida yangi silkinishlar bo‘lishi mumkinligini aytdi.
Olimning so‘zlariga ko‘ra, Yer, Merkuriy va Saturnning alohida joylashuvi tufayli shu haftada Yerda 8,5 va undan yuqori magnitudali “megazilzila” sodir bo‘lishi mumkin.
“Tinch okeanining g‘arbiy qismida yana sezilarli tebranishlar kuzatildi. Shimolda Kamchatka, Kuril orollari va Yaponiya, Filippin ustidan, shuningdek, Sulavesi ustidan, Xalmaxera, ehtimol hatto Banda dengizi ustidan, Indoneziya. Bu 3 yoki 4-martgacha sezilarli bo‘lishi mumkin”, - dedi Xugerbits.
U ushbu hududlar aholisini seysmik faollik yuzaga kelgan taqdirda reja tayyorlashga chaqirdi.
“Mart oyining birinchi haftasi juda muhim bo‘ladi. Biz kuchli yoki o‘ta kuchli seysmik hodisani ko‘rishimiz mumkin. Bu barchani yuqori tayyorgarlikka chorlashi kerak. Agar siz seysmik xavfli hududda bo‘lsangiz, sizga doimo zilzila uchun favqulodda vaziyatlar rejasi kerak bo‘ladi. Prognozdan qat’i nazar, sizga zilzila uchun harakat rejasi kerak. Yer silkinishni boshlaganda, siz uydan yoki binodan juda tez chiqib ketish imkoniyatiga ega bo‘lishingiz kerak. Bu hayotni saqlab qoladi”, - deb tushuntirdi olim.
O‘z navbatida, rossiyalik ekspertlar golland tadqiqotchisining bayonotlarini tanqid qilishdi. Rossiya Fanlar akademiyasining Zilzilani bashorat qilish nazariyasi va matematik geofizika instituti direktori Potr Shebalin Xugerbitsni olim emas, balki bashoratchi deb atadi. Rossiya Fanlar akademiyasi Geofizika xizmati Kamchatka filiali direktori Danila Chebrovning RIA Novostiga aytishicha, yarimorolda zilziladan darak beruvchi hech qanday belgilar qayd etilmagan.
Xugerbits 3-fevral kuni “ertami-kechmi” Turkiyaning janubiy qismida, Suriya bilan chegarada 7,5 magnitudali silkinishlar bo‘lishini bashorat qilgan edi.
6 fevral kuni Turkiya janubi-sharqidagi Kaxramanmarash viloyatida 9 soatlik interval bilan 7,7 va 7,6 magnitudali zilzilalar sodir bo‘ldi. Rasmiylar bu misli ko‘rilmagan “asr falokati” ekanini aytdi. Favqulodda vaziyatlar boshqarmasi ma’lumotlariga ko‘ra, zilzilalar qurbonlari soni 45 mingdan oshdi.