Rossiya Osiyo shaxmat federatsiyasiga a’zo bo‘ldi

Osiyo shaxmat federatsiyasi o‘z tarkibiga Rossiya qo‘shilganini rasman tasdiqladi.
Sputnik
TOShKENT, 1 mar — Sputnik. Birlashgan Arab Amirliklarining Abu-Dabi shahrida o‘tgan Osiyo shaxmat federatsiyasi Bosh Assambleya yig‘ilishida Rossiya shaxmat federatsiyasi tashkilotga a’zolikka qabul qilindi. Bu haqda federatsiya xabar berdi.
Ma’lum qilinishicha, Bosh Assambleya yig‘ilishida 29 delegat Rossiyani Osiyo shaxmat federatsiyasi tarkibiga kirishini qo‘llab-quvvatlagan bo‘lsa, bir nafari qarshi, yana olti nafar delegat esa betarafligini bildirgan.
"Ovoz berish jarayoni Xalqaro shaxmat federatsiyasi tomonidan ruxsat berilganidan keyin o‘tkazildi", deyiladi FIDE xabarida.
Rossiya shahmat federatsiyasining Osiyo tarkibiga qo‘shilishi rasman tasdiqlangan va bu 1-maydan to‘liq kuchga kiradi. Shu sababli ushbu mamlakat shaxmatchilari 2-mart kuni Serbiyada boshlanayotgan Yevropa chempionatida FIDE bayrog‘i ostida ishtirok etishi mumkin bo‘ladi.