TOShKENT, 26 yanv — Sputnik. G‘arb Ukrainaga yetkazib berayotgan "Abrams" va "Leopard" tanklari xususiyatlari jihatidan Rossiyaning T-80 laridan ham yomonroq. Bu haqda Venadagi harbiy xavfsizlik va qurol nazorati bo‘yicha muzokaralarda Rossiya delegatsiyasi rahbari Konstantin Gavrilov ta’kidladi.
“Tanklar xuddi qurol bilan ta’minlangan oddiy qutilar. Abrams va Leopard unchalik farq qilmaydi, ular hatto bizning T-80 lardan ham yomonroq, buni harbiylar biladi”, - dedi Gavrilov.
Chorshanba kuni Germaniya hukumati Germaniyaning "Leopard 2" tanklarini Ukrainaga topshirishga qaror qilganini e’lon qildi. Germaniya ikkita tank batalonini tuzmoqchi, birinchi bosqichda Bundesver zaxirasidan 14 ta tank taqdim etiladi. Bundan tashqari, yaqin orada ukrainalik harbiylarni Germaniyada o‘qitish tashkil etiladi. 14 ta tank va treningdan tashqari, Ukraina uchun Germaniyaning yangi yordam paketi logistika, o‘q-dorilar va tizimlarga texnik xizmat ko‘rsatishni o‘z ichiga oladi.
Chorshanba kuni Oq uy ham Ukrainaga 31 ta "M1 Abrams" tankini jo‘natish niyatini tasdiqladi. AQSh rasmiylariga ko‘ra, mashinalarni yetkazib berish uchun bir necha oy kerak bo‘ladi.
Rossiyaning Germaniyadagi elchisi Sergey Nechayev Berlinning Ukrainaga tanklarni yuborish haqidagi qarorini “o‘ta xavfli” deb atadi. Uning fikricha, bu “mojaroni qarama-qarshilikning yangi darajasiga ko‘taradi”.
Avvalroq Rossiya Ukrainaga qurol yetkazib berilgani uchun NATO davlatlariga nota yuborgan edi. Rossiya tashqi ishlar vaziri Sergey Lavrov Ukraina uchun qurol bo‘lgan har qanday yuk Rossiya uchun qonuniy nishonga aylanishini ta’kidladi. Rossiya tashqi ishlar vazirligi NATO davlatlari Ukrainaga qurol yetkazib berish orqali “o‘t bilan o‘ynamoqda”, deb ta’kidladi. Rossiya prezidentining matbuot kotibi Dmitriy Peskov Ukrainaga G‘arbdan qurol-yarog‘ yetkazib berish Rossiya-Ukraina muzokaralarining muvaffaqiyatiga hissa qo‘shmasligi va salbiy ta’sir ko‘rsatishini ta’kidladi.