TOShKENT, 31 dek - Sputnik. O‘zbekiston prezidentining qarori bilan tugatilgan yoki boshqa idoraga biriktirib yuborilgan vazirlik va idoralarning sobiq rahbarlari yangi lavozimlarga tayinlandi.
Prezidentning qarori bilan:
Sherzod Saidjonovich Hidoyatov qurilish va uy-joy kommunal xo‘jaligi vazirining birinchi o‘rinbosari lavozimiga;
Nozim Baxtiyorovich Husanov O‘zbekiston Respublikasi
kambag‘allikni qisqartirish va bandlik vazirining birinchi o‘rinbosari lavozimiga;
Agrippina Vasilyevna Shin O‘zbekiston Respublikasi maktabgacha va maktab ta’limi vazirining birinchi o‘rinbosari lavozimiga;
Narzullo Naimovich Oblomuradov O‘zbekiston Respublikasi tabiat resurslari vazirining o‘rinbosari lavozimiga;
Ulug‘bek Ahmadovich Azamov O‘zbekiston Respublikasi madaniyat va turizm vazirining birinchi o‘rinbosari lavozimiga;
Alisher Zafar o‘g‘li Sa’dullayev O‘zbekiston Respublikasi yoshlar siyosati va sport vazirining birinchi o‘rinbosari – Yoshlar ishlari agentligi direktori lavozimiga tayinlandi.
Eslatib o‘tamiz, prezidentning “Yangi O‘zbekiston ma’muriy islohotlarini amalga oshirish chora-tadbirlari to‘g‘risida”gi farmoni bilan 2023-yil 1-yanvardan Vazirlar Mahkamasi tarkibidagi vazirliklar 25 tadan 21 taga qisqartirilmoqda.
Farmonga muvofiq Uy-joy kommunal xo‘jaligi vazirligi Qurilish vazirligi bilan, Maktabgacha ta’lim vazirligi Xalq ta’limi vazirligi bilan qo‘shib yuborildi. Shuningdek, Bandlik va mehnat munosabatlari vazirligi Kambag‘allikni qisqartirish va bandlik vazirligi shaklida qayta tashkil etildi. Ekologiya va atrof-muhitni muhofaza qilish qo‘mitasi esa Tabiat resurslari vazirligiga aylantirildi.