Sport sarhisobi-2022: o‘zbekistonlik sportchilarning yorqin g‘alabalari

Yakunlanayotgan 2022-yil O‘zbekiston sportida yorqin g‘alabalarga boy bo‘ldi. Mamlakat sportchilari jahon va Osiyo birinchiliklari, turli xalqaro musobaqalarda sportning shaxmat, boks, og‘ir atletika, dzudo va futbol kabi turlarida g‘alaba qozonib, O‘zbekiston shuhratini dunyoga yoyishdi. Yilning sport sarhisobi – Sputnik materialida.

Hindistonda o‘tkazilgan 44-Butun jahon shaxmat olimpiadasi O‘zbekiston o‘z tarixida ilk bor chempion bo‘ldi. Shaxmatchilar Nodirbek Abdusattorov, Nodirbek Yakubbayev, Javohir Sindorov, Jahongir Vohidov, Shamsiddin Vohidovlar mamlakat sporti tarixida yangi sahifani ochib berishdi. Shuningdek, Olimpiadaning har bir doskaning individual o‘yinlarida Jahongir Vohidov oltin, Nodirbek Abdusattorov kumush, Nodirbek Yakubbayev esa bronza medalini qo‘lga kiritdi. Ularni prezident Shavkat Mirziyoyev shaxsan telefon qilib tabrikladi va millatning “oltin fondi” deb atadi. Davlat shaxmatchilarni munosib taqdirladi.

Quddus shahrida o‘tgan shaxmatning FIDE yo‘nalishi bo‘yicha jamoalar o‘rtasidagi jahon chempionatida O‘zbekiston terma jamoasi ikkinchi o‘rinni egalladi.

Umida Omonova Gretsiyadagi shaxmat bo‘yicha yoshlar o‘rtasidagi jahon chempionatida ham rapid, ham blis bo‘yicha g‘alaba qozonib, musobaqani ikkita oltin bilan tugatdi. Humoyun Bekmurodov esa "Open12" guruhida ikkala yo‘nalishda ham kumush medali sohibi bo‘ldi.

Joriy yilda jahon shaxmat reytingida O‘zbekiston ilk bor kuchli yigirmatalikka kirdi.

Davlat Bobonov va Muzaffarbek To‘raboyev qo‘lga kiritgan oltin medallar evaziga O‘zbekiston ilk bor jahon chempionatining yakkalik bellashuvlarida umumjamoa hisobida uchinchi bo‘ldi. Toshkentda o‘tgan final musobaqalarga Shavkat Mirziyoyev ham tashrif buyurib, Bobonovning g‘alabasiga guvoh bo‘ldi. Sovrindor dzudochilar, jumladan, Bobonov oltin medalni davlat rahbari qo‘lidan qabul qilib oldi. O‘zbekiston birinchi bor dzudo bo‘yicha dunyo birinchiligini umumjamoa hisobida kuchli uchlikda yakunladi.

Qozog‘istonda dzudo bo‘yicha o‘tkazilgan Osiyo chempionatida O‘zbekiston terma jamoasi umumjamoa hisobida uchinchi o‘rinni egalladi. Unda Diyora Keldiyorova ikki karra Osiyo chempioni unvoniga sazovor bo‘ldi.

Keldiyorova Ozarbayjondagi "Katta dubulg‘a" turkumiga kiruvchi navbatdagi turnirda ham oltin medalga ega chiqdi. Shu g‘alaba unga jahon reytingi yetakchisiga aylanishga imkon berdi. Shu paytgacha hech bir o‘zbekistonlik dzudochi qiz dunyo reytingida birinchi o‘ringa ko‘tarilmagandi.

Hech bir mubolag‘asiz bu yil og‘ir atletikachilar omadli keldi deyishimiz mumkin. Gretsiyadagi og‘ir atletika bo‘yicha yoshlar o‘rtasidagi jahon chempionatida Sharofiddin Amriddinov va Tursunoy Jabborova oltin medalni qo‘lga kiritishdi. Sharofiddin Amriddinov Bahrayndagi Osiyo chempionatida ham oltin medalga ega chiqdi. Adhamjon Ergashev davlat bayrog‘ini baland ko‘tarib, mutlaq Osiyo chempioni unvoni oldi. Umuman olganda, O‘zbekiston erkaklar jamoasi qit’a birinchiligida umumjamoa hisobida birinchi bo‘ldi.

Bundan tashqari, Toshkentda o‘tgan og‘ir atletika bo‘yicha o‘smirlar va yoshlar o‘rtasidagi Osiyo chempionatida o‘zbekistonlik sportchilar umumjamoa hisobida birinchi bo‘lishdi. Nigora Suvonova Osiyo chempionatining barcha turdagi dasturlari bo‘yicha 6 ta oltin medalni qo‘lga kiritdi.

Kolumbiyada bo‘lib o‘tgan jahon chempionatida g‘oliblikni qo‘lga kiritgan Ruslan Nurudinov esa ikki bor jahon chempioni unvoniga sazovor bo‘lgan birinchi o‘zbek og‘ir atletikachisiga aylandi.

O‘zbekistonlik bokschilar dunyodagi eng kuchlilardan ekani hech kimga sir emas. Ular bu unvonni munosib himoya qilib kelishmoqda – ham kattalar, ham yosh avlod. Buning tasdig‘ini quyida keltiramiz.

Boks bo‘yicha O‘zbekiston erkaklar milliy jamoasi Iordaniyada o‘tkazilgan 2022-yilgi Osiyo chempionatida umumjamoa hisobida birinchi bo‘ldi. Qit’a birinchiligida biz bilgan nomdor bokschilar Hasanboy Do‘smatov, Abdumalik Xalakov, Ruslan Abdullayev, Saidjamshid Jafarov va Lazizbek Mullajonovlar “oltin”ga ega chiqishdi.

O‘zbekistonlik yosh bokschilar Ispaniyadagi boks bo‘yicha yoshlar o‘rtasidagi jahon chempionatida tengiz bo‘lishdi. Iordaniyadagi o‘smirlar o‘rtasidagi bahslarda o‘zbekistonliklarga teng keladigani topilmadi.

Shahram G‘iyosov AQShda meksikalik Kristian Gomesni mag‘lub etdi va vakant bo‘lgan IBF North American chempionlik kamarini qo‘lga kiritdi. Murodjon Ahmadaliyev amerikalik Ronni Rios ustidan g‘alaba qozonib, WBA va IBF chempionlik kamarlarini himoya qila oldi.

O‘zbekiston terma jamoasi Janubiy Koreyadagi taekvondo WT bo‘yicha Osiyo chempionatida 4 ta oltin medalga sazovor bo‘lib, tarixiy natija qayd etdi. Ulug‘bek Rashitov, Nikita Rafalovich, Jasur Jaysunov va Shuhrat Salayev Osiyo chempioni bo‘lishdi. Charos Qayumova esa musobaqani kumush medal bilan yakunladi. Osiyo chempionatidan so‘ng taekvondochilarning yangilangan reytingi e’lon qilindi. Unda Charos Qayumova ilk bor ayollar o‘rtasidagi jahon reytingi yetakchisiga aylandi

Meksikada jahon chempionatida o‘zbek taekvondosi tarixida ilk bor Svetlana Osipova ayollar o‘rtasida oltin medalni qo‘lga kiritib, jahon chempioni bo‘ldi.

Bolgariyadagi taekvondo WT bo‘yicha kadetlar o‘rtasidagi jahon chempionatida Laylo Hasanova “oltin”ga sazovor bo‘ldi. Bundan tashqari, u eng yaxshi qiz taekvondochi deb topildi.

15 yoshli Sharifa Davronova uch hatlab sakrash dasturida jahon chempioni bo‘ldi. U Kolumbiyadagi yengil atletika bo‘yicha yoshlar o‘rtasidagi (U20) jahon chempionatida barcha raqibalarini ortda qoldirdi. Keyin u Islom birdamliklari o‘yinlari va Osiyo chempionatida oltin medalni qo‘lga kiritdi.

Kuvaytda o‘tgan yengil atletika bo‘yicha yoshlar o‘rtasidagi Osiyo chempionatida O‘zbekiston terma jamoasi 3-o‘rinni egalladi.

Toshkent mezbonlik qilgan badiiy gimnastika bo‘yicha jahon kubogining ikkinchi bosqichida O‘zbekiston 7 ta medalni qo‘lga kiritdi: 4 ta oltin, 2 ta kumush Bu terma jamoaning jahon chempionati tarixidagi eng yaxshi natijasi hisoblanadi. Taxmina Ikromova ko‘pkurash, halqa va bulava mashqlarida oltin, tasmada esa bronza medalini qo‘lga kiritdi.

Ozarbayjonda bo‘lib o‘tgan sport gimnastikasi bo‘yicha jahon kubogi final bosqichida Oksana Chusovitina oltin medalni qo‘lga kiritdi. Chusovitina Misrda o‘tgan jahon kubogining 3-bosqichida esa kumush medalga sazovor bo‘lgandi.

Aytjan Xalmaxanov — sport kurashlari bo‘yicha jahon chempioni. U Italiya poytaxtidagi erkin, yunon-rum va ayollar kurashi bo‘yicha o‘smirlar o‘rtasidagi jahon chempionatida oltin medalga sazovor bo‘ldi. Shahzod Ro‘zioxunov jahon chempionatining kumush medali sohibi.

BAAdagi qilichbozlik bo‘yicha o‘smirlar va yoshlar o‘rtasidagi jahon chempionatining ikkinchi kuni O‘zbekiston sporti uchun tarixiy sanaga aylandi. Chunki sablyachi Zuhriddin Qodirov O‘zbekiston tarixida jahon chempionligini qo‘lga kiritgan ilk qilichboz bo‘ldi.

Hindistonda o‘tgan kurash bo‘yicha kattalar o‘rtasida jahon chempionatida, Tataristondagi Osiyo chempionatida O‘zbekiston umumjamoa hisobida birinchi o‘rinni qo‘lga kiritdi.

O‘zbekiston milliy terma jamoasi muddatidan ilgari 2023-yilda futbol bo‘yicha bo‘lib o‘tadigan Osiyo kubogiga yo‘llanma oldi. O‘zbekiston ketma-ket 8-marta unda ishtirok etadi. Toshkentda bo‘lib o‘tgan U23 Osiyo kubogida o‘zbekistonlik futbolchilar kumush medalga ega chiqishdi.

O‘zbekiston ayollar milliy terma jamoasi Dushanbeda ilk bor rasman o‘tkazilgan CAFA Womenʼs Championship-2022 da g‘alaba qozonib, musobaqa chempioniga aylandi.

Turkiyada bo‘lib o‘tgan amputant futbolchilar o‘rtasidagi jahon chempionatida O‘zbekiston termasi bronza medalini qo‘lga kiritdi.

O‘zbekiston amputantlar termasi bunga qadar jahon chempionatida uchta oltin (2007, 2010, 2012), bitta kumush (1998) va ikkita bronza (1991, 2002) medalga ega chiqqan.

Kuvaytda o‘tkazilgan futzal bo‘yicha o‘tkazilgan Osiyo kubogida O‘zbekiston milliy jamoasi 3-o‘rinni egalladi.

Bundan tashqari, O‘zbekiston “Osiyo bolalari” o‘yinlarida umumjamoa hisobida ikkinchi o‘rinni qo‘lga kiritdi. Vladivostokda bo‘lib o‘tgan musobaqalarda yosh o‘zbekistonlik sportchilar jami 114 ta medal jamg‘arishga erishishdi, shulardan 41 tasi “oltin”.

Turkiyaning Konya shahrida o‘tkazilgan V Islom birdamligi o‘yinlari O‘zbekiston termasi jami 51 ta oltin, 42 ta kumush va 65 ta bronza medalini qo‘lga kiritib, umumjamoa hisobida ikkinchi o‘rinni egalladi.

Qayd etish joizki, O‘zbekiston o‘z siyosatida sportni rivojlantirishga katta e’tibor qaratmoqda. Shaxmat, taekvondo, dzudo va boks kabi sport turlari bo‘yicha qabul qilingan qarorlar so‘zimizning dalili. Bular, shubhasiz, sportchilarning zafarlari davomli bo‘lishiga xizmat qiladi.