Shavkat Mirziyoyev Fransiya biznesi vakillari bilan uchrashdi

TOShKENT, 22 noya - Sputnik. O‘zbekiston grezidenti Shavkat Mirziyoyev Fransiyaga rasmiy tashrifi doirasida yetakchi kompaniya va moliyaviy tuzilmalar rahbarlari bilan uchrashuv o‘tkazdi.

Uchrashuvda Shavkat Mirziyoyev O‘zbekiston iqtisodiyotida yuqori qo‘shilgan qiymatli mahsulotlar ishlab chiqarish quvvatlarini barpo etish, “yashil” energetika, oziq-ovqat sanoati, kimyo va avtomobilsozlik, elektrotexnika va elektronika tarmoqlari, sog‘liqni saqlash sohasini uzoq muddatli va o‘zaro manfaatli hamkorlik uchun eng istiqbolli yo‘nalishlar sifatida qayd etdi.

Shuningdek, O‘zbekiston fransiyalik tadbirkorlarni ishlab chiqarish uchun zarur infratuzilma bilan ta’minlash, imtiyozlar va kafolatlangan xaridlar ko‘rinishida qo‘llab-quvvatlash va boshqa ko‘mak choralarini taqdim etishga tayyor ekani ta’kidlandi.

Undan tashqari, O‘zbekistonda xorijiy investorlar uchun keng imkoniyatlar yaratilgani, jumladan valyuta bozori erkinlashtirilgani, foydani repatriatsiya qilishni cheklovchi barcha to‘siqlar bekor qilingani, banklar, yirik sanoat va infratuzilma obyektlarini xususiylashtirish dasturi boshlangani hamda davlat-xususiy sheriklik mexanizmlari faol joriy etilayotgani alohida ta’kidlab o‘tildi.

Fransiya tomonidan tadbirda "MEDEF" Fransiya korxonalari harakati bosh direktori Filipp Gotye, "Airbus", "Orano", "Suez", "Alstom", "Total Eren", "EDF", "Schneider Electric", "Natixis" kabi 20 taga yaqin yirik kompaniya va banklar rahbarlari ishtirok etdi.