TOShKENT, 18 noya — Sputnik. Ukraina Qurolli Kuchlari harbiylari Lugansk xalq respublikasining ba’zi hududlarida o‘zining hujum qobiliyatini yo‘qotib, himoyaga o‘tmoqda. Bu haqda Respublika xalq militsiyasi zobiti Andrey Marochko Birinchi kanal efirida aytib o‘tdi, deb xabar berdi RIA Novosti.
“Ijobiy tendensiya mavjud – ba’zi hududlarda dushman kuchini yo‘qotayotgani ayon bo‘lyapti: u faol hujum operatsiyalaridan mobil va ko‘r-ko‘rona mudofaaga o‘tmoqda. Bu zaxiralarning bir qismi tugaganidan, jismoniy charchoq borligidan dalolat beradi”, - deydi u.
Shu bilan birga, ofitser Ukraina qo‘shinlari qariyb bir oydan beri respublika shimoliga bostirib kirishga urinayotganini eslatdi. Hozir ham hujumlar to‘xtamayapti. Nisbatan faol janglar Svatovo aholi punkti atrofida davom etmoqda.
“Dushman <...> har kuni mudofaa chizig‘ini yorib o‘tishga urinyapti”, - deya aniqlik kiritdi harbiy.
Bundan tashqari, ofitser Ukraina Qurolli Kuchlari G‘arb qurollariga o‘q-dorilar yetishmovchiligiga duch kelganini qo‘shimcha qildi.
“HIMARS yalpi reaktiv hujum tizimida borgan sari yangi raketalar qo‘llanilmoqda. Brankaga uchirilgan raketalarda 2020-yil sanasi ko‘rsatilgan. Ta’kidlashni istardimki, biz avvalroq 2015-2016 yillarni qayd etgan edik. Endi esa 2020-yil. Bu zaxiralar allaqachon tugab borayotganidan, ko‘proq yangi o‘q-dorilar ishlatilayotganidan dalolat beradi”, - deydi Marochko.
15 noyabr kuni ofitser Ukraina qo‘shinlari Svatovo, Kremennaya, Lisichansk va Popasna yo‘nalishida o‘z guruhlarini zirhli tank guruhlari bilan mustahkamlagani haqida xabar bergandi. Marochko razvedka ma’lumotlari va dushman xatti-harakatlari xarakteriga ko‘ra, Ukraina Qurolli Kuchlari asosiy kuchlarini shu hududga qaratayotganini qayd etgandi.
Rossiya 24-fevraldan beri Ukrainada harbiy operatsiya o‘tkazmoqda. Mudofaa vazirligi ma’lumotlariga ko‘ra, harbiy harakatlardan asosiy maqsad Donbassni ozod qilishdir. Sentabr oyida DXR va LXR ushbu hududlarda o‘tkazilgan referendum natijalariga ko‘ra Rossiyaga qabul qilindi.