TOShKENT, 26 okt — Sputnik. Polimerlar kimosi va fizikasi instituti “Nanoderm” - turli xil kuygan yara va chuqur yaralarni davolovchi bakteritsid xossali, bioeruvchan implant-plonkalar ishlab chiqardi. Bu haqida Fanlar akademiyasi xabar berdi.
Aytilishicha, ilk bor nanotexnologiya prinsiplarini qo‘llagan holda kumush nanozarralari bioeruvchan, bioparchalanuvchan polimer plonkalarida shakllantirildi.
Plonka kuygan yaralar yuzasidan olib tashlanmaydi, vaqt o‘tishi bilan so‘rilib ketadi, bu o‘z navbatida bakteriyalarga qarshi davolash samaradorligini oshiradi.
“Mazkur plonka kuygan yaralarga qo‘llanilgan vaqt davomida bosqichma-bosqich ta’sirga ega. Plonka tarkibidagi biologik faol modda eritma, gel shaklidagi dori vositasiga nisbatan uzoqroq vaqt ta’sir etadi. Kuyganlik darajasiga qarab bir necha marotaba qo‘llash mumkin”, deyiladi xabarda.
“Nanoderm” plonkasi keng ta’sirga ega bo‘lib, mikroorganizmlarga qarshi faollik, kuygan to‘qimalarni regeneratsiyalovchi xossalarni namoyon etadi.
Dori plonkasi yuqori sorbsion xossani namoyon etib, kuygan yaralar yuzasidagi hosil bo‘lgan yiringlarni o‘ziga shimib oladi. U mikroorganizmlarga nisbatan uzoq ta’sirlashish xossasiga ega.