TOShKENT, 24 okt — Sputnik. Keskin o‘sishdan so‘ng, sentabr oyida ko‘chmas mulk bozoridagi sotuvlar biroz pasaydi. Bu haqida Iqtisodiy tadqiqotlar va islohotlar markazi xabar berdi.
Markaz sentabr oyida ko‘chmas mulk bozoridagi vaziyatni tahlil qildi.
Unga ko‘ra, ro‘yxatga olingan ko‘chmas mulk oldi-sotdi shartnomalari soni o‘tgan yilning shu davriga nisbatan 19%ga (+3,7 ming) oshdi.
Avgust oyiga nisbatan ko‘chmas mulk savdosining biroz pasayishi kuzatildi.
“Bu asosan o‘quv yilining boshlanishi va chet el fuqarolari sonining sezilarli darajada ko‘payishi tufayli ijaraga beriladigan uy-joylarga talabning oshishi bilan bog‘liq”, deyiladi xabarda.
Toshkent shahrida 1 kv.m uchun o‘rtacha ijara narxi yil boshidan buyon 22,4%ga oshdi. Yil boshidan beri ikkilamchi bozorda 1 kv.m uchun o‘rtacha uy-joy narxi 8,9%ga oshdi.
Toshkent shahrida 9 oy davomida uy-joy savdosi o‘tgan yilning shu davriga nisbatan 6%ga o‘sdi.
Eslatib o‘tamiz, avvalroq Toshkentda ijara narxlari bo‘yicha eng baland narx Mirobod va Yakkasaroy tumanlarida qayd etilgandi. Unga ko‘ra, Toshkentda ko‘p qavatli uylardagi ijara narxi o‘rtacha 339 dollarga, ijara narxlari bo‘yicha eng past narx Sergeli va Olmazor tumanlarida, eng baland narx esa Mirobod va Yakkasaroy tumanlarida qayd etilgandi.