TOShKENT, 8 okt — Sputnik. O‘zbekiston Tashqi ishlar vazirligi iqtisodiy diplomatiya doirasida raqamli dayjestni ishga tushirdi.
Aytilishicha, O‘zbekistonning iqtisodiy diplomatiyasini rivojlantirish, mamlakat haqida xalqaro hamjamiyat xabardorligini oshirish maqsadida vazirlik tomonidan New Uzbekistan. New Opportunities raqamli dayjestining birinchi elektron jo‘natmasi amalga oshirildi.
Dayjestda O‘zbekistonning iqtisodiy hayotidagi so‘nggi o‘zgarishlar, amalga oshirilayotgan islohot va yangilanishlar, biznesning yangi imkoniyatlari, muvaffaqiyatli hodisalar va bo‘lajak tadbirlar haqida ma’lumotlar mavjud.
Raqamli dayjest quyidagilarga tarqatish uchun mo‘ljallangan:
Xorijiy ishbilarmon doiralar;
Kompaniyalar;
Investitsiya fondlari va banklari;
Xalqaro tashkilotlar va moliya institutlari;
Global reyting agentliklari;
Toshkentdagi diplomatik korpusi.
Tashqi ishlar vazirligining Iqtisodiy diplomatiya boshqarmasi tomonidan amalga oshirilgan birinchi jo‘natmalar xorijdagi 3000 dan ortiq manzillarni qamrab oldi.
Aloqa bazasi kengayib borishi bilan ularning sonini bosqichma-bosqich oshirish rejalashtirilgan.