TOShKENT, 8 okt – Sputnik. Qrim ko‘prigida yuk mashinasining portlashi oqibatida uch kishi halok bo‘ldi. Bu haqda Rossiya Tergov qo‘mitasi dastlabki tergov natijalariga ko‘ra ma’lum qildi.
“Bular portlatilgan yuk mashinasi yonida bo‘lgan yengil avtomobil yo‘lovchilari deb taxmin qilinmoqda. Ayni damda halok bo‘lgan bir erkak va bir ayolning jasadi suvdan chiqarib olingan, ularning shaxsi aniqlanmoqda”, - deyiladi Tergov qo‘mitasi bayonotida.
Shuningdek, portlagan yuk mashinasi haydovchisi Krasnodar o‘lkasida yashovchi bo‘lgani ma’lum. Ayni damda uning turar joyida surishtiruv ishlari olib borilmoqda.
"Uning yashash joyida surishtiruv harakatlari boshlandi. Mashinaning harakatlanish yo‘nalishi va tegishli hujjatlar o‘rganilmoqda", — deyiladi Tergov qo‘mitasida.
Avvalroq Milliy aksilterror qo‘mitasi Qrim ko‘prigida yuk mashinasi portlagani haqida xabar bergan edi. O‘tish joyining temir yo‘l qismi bo‘ylab yettita yoqilg‘i sisternasi yonib ketgan. Oqibatda ikkita avtomashina oraliqlari qisman qulab tushdi, biroq kemalar o‘tish uchun arkning tayanchlari shikastlanmadi.
Qutqaruvchilar yong‘inni o‘chirishdi. Ko‘prikda harakat vaqtinchalik to‘xtatilgan. Ikki yo‘nalishda poyezd va avtobuslar o‘tishi to‘xtatilgan.
Respublika transport vaziri Nikolay Lukashenkoning so‘zlariga ko‘ra, Qrim va Krasnodar o‘lkasi o‘rtasida yo‘lovchi tashish uchun 100 kishilik kemalar ishga tushirilishini ma’lum qilishdi. Rasmiylar, yaqin vaqt ichida ikkita paromni ishga tushirishga va’da berishdi.