Toshkent-Chirchiq-Hojikent yo‘nalishi bo‘yicha elektropoyezd qatnovi yo‘lga qo‘yildi

TOShKENT, 24 sen - Sputnik. Yo‘lovchilarga qulaylik yaratish maqsadida Toshkent — Chirchiq — Xojikent shaharlararo tezurar elektropoyezdlar qatnovi joriy etildi. Bu haqda “O‘ztemiryo‘lyo‘lovchi” AJ matbuot xizmati xabar berdi.

Qayd etilishicha, Toshkent — Chirchiq — Xojikent temir yo‘l hududi infratuzilmasi zamonaviy talablarga javob berishini ta’minlash maqsadida yangi temir yo‘l o‘tkazgichlar qurilishi ishlari tugatilgan, uchastka bo‘ylab temir yo‘l izlari ta’mirlangan, temir beton ustunlari yangilangan.

Shu munosabat bilan 24-sentabr kunidan boshlab haftaning har shanba va yakshanba kunlari harakatlanadigan Toshkent — Chirchik — Xojikent yo‘nalishida tezurar elektropoyezdlar qatnovi joriy etilgan, natijada yo‘lga sarflanadigan vaqt 1 soatga qisqargan.

Jadval ishlab chiqish natijasida Toshkent — Chirchiq oralig‘idagi elektropoyezdning harakatlanish vaqti 45 daqiqaga, Chirchiq — Xojikent oralig‘ida 15 daqiqaga qisqargan va yo‘lga sarflanadigan umumiy vaqt 1 soat 40 daqiqani tashkil etgan.