TOShKENT, 22 sen — Sputnik. Astraxanda Kaspiy dengizi mamlakatlari o‘rtasida turizm, sog‘liqni saqlash va ijtimoiy sohalarda hamkorlikni rivojlantirishga ko‘maklashish maqsadida xalqaro tibbiyot forumi o‘tkazilmoqda. Bu haqida Astraxan viloyati gubernatori Igor Babushkin o‘zining Telegram-kanalida ma’lum qildi.
"Bugun Astraxanda Kaspiy xalqaro tibbiyot forumi ochildi. Forum Ozarbayjon, Qozog‘iston, Turkmaniston, O‘zbekiston, Belarus va Rossiyadan 2500 dan ortiq ishtirokchini birlashtirdi", deydi gubernator.
Uch kun davomida ishtirokchilar ilmiy-amaliy konferensiyalar, davra suhbatlari, simpoziumlar va akademik ma’ruzalarda ishtirok etishadi.
Shuningdek, Oltoy davlat tibbiyot universiteti qoshidagi “Universitet klinikasi” loyihasi doirasida Rossiya Fanlar akademiyasining yetakchi akademiklari xalqaro tibbiyotning dolzarb masalalari bo‘yicha ma’ruzalar o‘qiydi. Astraxan klinikalarida bemorlarning diagnostikasi va davolash bo‘yicha maslahatlar berishadi.
"2021 yilda prezident Vladimir Putin Kaspiy dengizi mamlakatlari o‘rtasida turizm, sog‘liqni saqlash va ijtimoiy sohada xalqaro hamkorlikni rivojlantirish uchun markazi Astraxanda joylashgan Kaspiy kengashini tashkil etish tashabbusi bilan chiqdi. Ushbu o‘zaro hamkorlik doirasida “Tibbiy xizmatlar eksportini rivojlantirish” dasturi amalga oshirilmoqda”, deydi Babushkin.
Viloyat hokimi, shuningdek, tadbirda ishtirok etayotgan mamlakatlar mutaxassislarining yaqindan o‘zaro hamkorligi viloyatning sog‘liqni saqlash va ijtimoiy sohasiga qo‘shimcha sarmoya jalb etishi, yetakchi tibbiyot markazlarining hamkorligi mintaqa tibbiyoti rivojiga turtki bo‘lishini ta’kidladi.