TOShKENT, 4 avg — Sputnik. Davlat qarzini boshqarish sohasida O‘zbekiston prezidenti, Oliy Majlis palatalari, Hisob palatasi, Vazirlar Mahkamasi, Markaziy bank va Moliya vazirligining vakolatlari belgilanmoqda. Bu haqida Senatning yigirma to‘qqizinchi yalpi majlisida ma’lum qilindi.
Qayd etilishicha, “Davlat qarzi to‘g‘risida”gi Qonun bilan Moliya vazirligi davlat qarzini boshqarish bo‘yicha vakolatli organ etib belgilanmoqda.
“Qonunda davlat qarzini boshqarish bo‘yicha parlament vakolatlari ham belgilanyapti. Davlat qarzini boshqarish strategiyasi amalga oshirilishi, jalb qilingan mablag‘lardan maqsadli va samarali foydalanilishi, loyihalar natijadorligi kabi muhim jihatlar doimiy diqqat markazimizda bo‘ladi. Bu masala mahalliy kengashlarning ham nazoratida bo‘lishi kerak”, deydi Senat raisi Tanzila Narbayeva.
Senat raisi o‘z so‘zida barchani mamlakat, xususan hududlarni ijtimoiy-iqtisodiy rivojlantirishga doir dasturiy vazifalarning ijro etilishi holatlariga befarq bo‘lmaslikka chaqirdi. Shuningdek, qonun qabul qilinganidan keyin uning ijrosi bilan bog‘liq tadbirlarni monitoring qilib borilishini qayd etdi.
Hujjatda davlat qarzi summasining yalpi ichki mahsulotga nisbatan eng yuqori miqdori 60 foizdan oshmasligi, davlat qarzi hisobidan faqat ijtimoiy va infratuzilma loyihalarini moliyalashtirish mumkinligi nazarda tutilgan.
Qolaversa, Moliya vazirligi tomonidan davlat qarzining holati va o‘zgarishi to‘g‘risidagi axborotlar yilning har choragida o‘z rasmiy veb-saytiga joylashtirilishi ham belgilangan.
Davlat qarzi to‘g‘risidagi qonun senatorlar tomonidan ma’qullandi.
Ma’lumot uchun, mazkur qonun bilan davlat qarzi va unga xizmat ko‘rsatish xarajatlarining ustuvorligi, davlat qarzining cheklangan hajmlari, davlat hokimiyati va boshqaruv organlarining davlat qarzini boshqarishdagi vakolatlari belgilanmoqda.