TOShKENT, 22-iyun — Sputnik. Jizzax viloyatining Zafarobod tumanida parvarish qilinganidan so‘ng burgut bolasi tabiat qo‘yniga qaytarildi. Bu haqda Davlat ekologiya qo‘mitasi xabar berdi.
Aytilishicha, burgut bolasi 4-iyun kuni Zafarobod tumani “Chimqo‘rg‘on” MFYda yosh bolalar tomonidan tutib olingan.
Yirtqich qush bolasi ucha olmay qolgan va u vaqtincha Zafarobod tuman veterinariya bo‘limi nazoratiga berilgan.
17 kun parvarish qilingan qush bolasi yana ucha boshladi.
Zafarobod tumani ekologiya va atrof-muhitni muhofaza qilish bo‘limi inspektori hamda tuman veterinariya bo‘limi xodimi bilan birgalikda yirtqich qush tabiat qo‘yniga qo‘yib yuborildi.