TOShKENT, 11-may — Sputnik. Sent-Vinsent va Grenadin orollari O‘zbekiston bilan diplomatiya munosabatlari o‘rnatgan 140-mamlakat bo‘ldi. Bu haqda "Dunyo" agentligi xabar berdi.
10 may kuni Nyu-Yorkda ikki mamlakatning BMTdagi doimiy vakillari Baxtiyor Ibragimov va Inga Ronda King diplomatik munosabatlari o‘rnatish to‘g‘risidagi qo‘shma kommunikeni imzoladi.
Tomonlar xalqaro tashkilotlar, jumladan, BMT va uning ixtisoslashgan tashkilotlari doirasida birgalikdagi ishlarni mustahkamlashdan manfaatdor ekanini tasdiqlagan. Ikki va ko‘p tomonlama kun tartibining dolzarb masalalari bo‘yicha muntazam aloqalarni qo‘llab-quvvatlash yuzasidan kelishuvga erishilgan.
Sent-Vinsent va Grenadin orollari Karib dengizi havzasining g‘arbiy qismida joylashgan. Mamlakat BMT faoliyatida faol ishtirok etib keladi, 2020—2021 yillarda BMT Xavfsizlik kengashining doimiy bo‘lmagan a’zosi, 2018—2019 yillarda esa tashkilotning Iqtisodiy va ijtimoiy kengashi raisi bo‘lgan.
Eslatib o‘tamiz, 2021-yilning mayida Dominika O‘zbekiston diplomatik aloqalar o‘rnatgan 137, Panama 138-davlat bo‘lgan edi. 2022-yil 9-mart kuni esa Sent-Kits va Nevis Federatsiyasi bilan diplomatiya aloqalar o‘rnatildi.