O‘zbekiston va Qozog‘iston o‘rtasida poyezd qatnovi tiklanishi ortga surilmoqda

Bunga Qozog‘istonda karantin cheklovlari joriy etilgani sabab qilib ko‘rsatilgan.
Sputnik
TOShKENT, 30 mar — Sputnik. Qozog‘iston Nukus – Beyneu va Toshkent – Olmaota yo‘nalishidagi xalqaro yo‘lovchi poyezdlari qatnovini boshlash sanasi keyingi muddatga ko‘chirmoqda. Bu haqda “O‘ztemiryo‘lyo‘lovchi” AJ matbuot xizmati xabar bermoqda.
Ta’kidlanishicha, qo‘shni davlat bunga mamlakatda karantin cheklovlari joriy etilganini sabab qilib ko‘rsatgan.
Mazkur qaror Qozog‘iston hududida koronavirus infeksiyasi paydo bo‘lishi va tarqalishining oldini olish bo‘yicha Idoralararo komissiya yig‘ilishi bayonnomasi bilan tasdiqlangan.
Chipta sotib olgan yo‘lovchilardan pulni qaytarib olish uchun temir yo‘l kassalariga murojaat qilish so‘ralgan. Chiptalarni keyingi sanalarga qayta rasmiylashtirib olish imkoniyati ham bor
Avvalroq 1-apreldan boshlab Nukus – Beyneu, 2-maydan boshlab Toshkent-Olmaota yo‘nalishida poyezd qatnovlari yo‘lga qo‘yilishi xabar qilingan edi.