TOShKENT, 4 fev - Sputnik. Shavkat Mirziyoyev "Pekin 2022" qishki Olimpiya o‘yinlarining ochilish marosimida ishtirok etish uchun Pekinga yetib keldi.
Xitoy poytaxtining “Shoudu” xalqaro aeroportida O‘zbekiston prezidentini ushbu mamlakatning rasmiy shaxslari kutib oldi.
Shavkat Mirziyoyev bugun Toshkent vaqti bilan soat 17:00 da Pekindagi “Qush uyasi” milliy stadioni bo‘lib o‘tadigan XXIV Qishki Olimpiada o‘yinlarining tantanali ochilish marosimida ishtirok etadi.
Shuningdek, prezident tashrifi dasturida qator ikki tomonlama uchrashuvlar ham rejalashtirilgan.
Ma’lumot uchun, Xitoy rahbari Si Szinpin 4—6 fevral kunlari Pekinda xorijiy davlatlar yetakchilari, hukumat rahbarlari, qirollik oilalari a’zolari va xalqaro tashkilotlar rahbarlari sharafiga qabul marosimi o‘tkazadi.
Mehmonlar orasida Rossiya, Singapur, Qozog‘iston, Qirg‘iziston, Tojikiston, Turkmaniston, O‘zbekiston, Misr, Polsha, Argentina rahbarlari, Kambodja qiroli, Qatar amiri, Saudiya Arabistoni valiahd shahzodasi, boshqa qator davlatlar yetakchilari, Xalqaro olimpiya qo‘mitasi prezidenti Tomas Bax, BMT Bosh kotibi Antoniu Guterrish, Jahon sog‘liqni saqlash tashkiloti bosh direktori Tedros Gebreyesus bor.
Eslatib o‘tamiz, XXIV qishki Olimpiya o‘yinlari Pekinda 2022-yilning 4-20 fevral kunlari bo‘lib o‘tadi. Olimpiada O‘zbekiston sharafini 24 yoshli tog‘ chang‘ichi Komiljon To‘xtayev himoya qiladi.
Shavkat Mirziyoyev pribil v Pekin
© Press-slujba prezidenta Uzbekistana